«Ժողովուրդ». Ինչ ունեցվածքով հեռացավ Արմավիրի մարզպետի նախկին տեղակալը, ում մինչ օրս չեն փոխարինել

«Ժողովուրդ» թերթը գրում է.

«Արմավիրի մարզպետարանի երկարամյա աշխատակիցը, ով հասել էր փոխմարզպետի պաշտոնի, գրչի մեկ հպումով ազատվել է պաշտոնից Նիկոլ Փաշինյանի հրամանով։ Խաչատուր Մկրտչյանը գրեթե 30 տարի համայնքապետարանում տարբեր պաշտոններ զբաղեցնելուն զուգահեռ համայնքապետարանի ենթակայության տակ գտնվող ՀՈԱԿ-ներում տեղավորել է կնոջը՝ Լուսածին Ալեքսանյանին և համատեղ բնակվող Անահիտ Մկրտչյանին։ Համաձայն 2024 թվականի եկամուտների, անշարժ գույքի, ծախսերի և շահերի հայտարարագրի՝ Մկրտչյանի կինը «Արմավիրի համայնքապետարանի գրադարան» ՀՈԱԿ-ի տնօրենն է, համատեղ բնակվող Անահիտ Մկրտչյանը «ՀՀ Արմավիրի մարզի Արմավիր համայնքի Արմավիր քաղաքի թիվ 10 մսուր-մանկապարտեզ» ՀՈԱԿ-ում որպես հոգեբան է աշխատում, իսկ որդին՝ Հովհաննես Մկրտչյանը, ՀՀ գլխավոր դատախազության տնտեսական գործունեության դեմ ուղղված հանցագործությունների գործերով վարչության ավագ դատախազ է։

Խաչատուր Մկրտչյանը 1996 թվականից Արմավիրի համայնքապետարանում աշխատանքի է տեղավորվել որպես ՀՀ Արմավիրի մարզպետարանի տրանսպորտի և ճանապարհաշինության բաժնի առաջատար, այնուհետև գլխավոր մասնագետ։ Դրանից հետո` 2000 թվականից, եղել է նաև Արմավիրի մարզպետարանում որպես Քաղաքաշինության վարչության պետ. նրա հաջորդ պաշտոնը կրկին մարզպետի տեղակալի պաշտոնն է եղել, ապա աշխատել է որպես խորհրդական և կրկին մարզպետի տեղակալ։ Փոխմարզպետը հայտարարագրել է 3 անշարժ գույք՝ 1 բնակարան բազմաբնակարան շենքում Արմավիրի մարզի Արմավիր համայնքում, և 2 հողամաս Շենավան համայնքում։ Բնակարանը Մկրտչյանը 2021 թվականին նվիրատվություն է ստացել։

Տվյալ տարվա ընթացքում նախկին փոխմարզպետը գնել է 2018 թվականի արտադրության, JEEP մակնիշի տրանսպորտի միջոց, որն արժեցել է 4 մլն դրամ։

Նրա բանկային հաշիվների մնացորդները կազմել են 1 մլն 275 հազար դրամ, կանխիկ դրամական միջոցները՝ 3 մլն դրամ։ Հաշվետու տարվա եկամուտները կազմել են 10 մլն 234 հազար դրամ, որից 9 մլն 158 հազար դրամն աշխատանքի վարձատրություն է Արմավիրի մարզի մարզպետի աշխատակազմից, 775 հազար 310 դրամը կենսաթոշակ է, իսկ 300 հազար 786 դրամն կրկին աշխատանքի վարձատրություն է Արմավիրի համայնքապետարանից։

Մկրտչյանը պաշտոնանկ է արվել այս տարվա հունվարի 7-ին՝ կրկին վարչապետի հրամանով. նրա պաշտոնը մինչ այս պահը թափուր է: Երկարամյա աշխատակցին փոխարինող չեն գտնում»։

Մանրամասները թերթի այսօրվա համարում։