Միջնորդել էինք Արսեն Ղուկասյանի առողջական ընդհանուր վիճակը ստուգվի, սակայն միայն սարքն է ստուգվել. Փաստաբան

«Արսեն Ղուկասյանը երկու օր առաջ քրեակատարողական հիմնարկից տեղափոխվել է բուժհասատատություն, որտեղ սրտի ստիմուլյատոր սարքն էր տեղադրվել»,- ֆեյսբուքյան ուղիղ եթերում ասաց 44-օրյա պատերազմում անհետ կորած զինծառայող Սարգիս Ղուկասյանի հորեղբոր՝ Արսեն Ղուկասյանի պաշտպան Տաթև Սողոյանը։

Նա նշեց, որ թեև իրենք միջնորդել էին Արսեն Ղուկասյանի առողջական ընդհանուր վիճակը ստուգվի, սակայն միայն սարքն է ստուգվել. «Ստուգման արդյունքում արձանագրվել է, որ միջադեպի օրը՝ սեպտեմբերի 29-ին սրտի սարքը կանխել է մեկ էական առիթիմի, դրանից հետո սարքը նորմալ աշխատում է։ 

Բայց զարկերակային ճնշումը բարձր էր՝ 150-110, ինչը բավական մտահոգիչ է։ Արդեն մի քանի անգամ նման ցուցանիշ է գրանցվել։ Տեղում ճնշումը իջեցնելու հրատապ միջոցներ են ձեռնարկում, բայց համակարգային ստուգման Արսեն Ղուկասյանը չի ենթարկվում»։ 

«Արսեն Ղուկասյանն արդեն երկրորդ շաբաթն է գտնվում  կալանավայրում՝ առողջության հետ անհամատեղելի պայմաններում»,- ասաց փաստաբանը։

Նա նշեց, որ գործը  մոտեցել է ավարտին, բայց շատ հարցեր  բաց են մնացել, հապճեպ են քննվել։

«Որոշում է կայացվել այս փուլում ավարտել Արսեն Ղուկասյանի մասով քրեական վարույթն ու ուղարկել դատարան»,- ասաց փաստաբան Տ.Սողոյանը։ 

Հիշեցնենք, որ Արսեն Ղուկասյանը ՊՆ վարչական շենքի մոտ ակցիայի ժամանակ ռազմական ոստիկանության ծառայողների հետ միջադեպից հետո ձերբակալվել է հոկտեմբերի 7-ին, ապա մեկ ամսով կալանավորվել «խուլիգանության» համար։ 

Մանրամասն՝ տեսանյութում։