Մի՞թե հոգևորականներս զբաղվում ենք քաղաքականությամբ. Հայր Շահե ծայրագույն վարդապետ Անանյան

«Բոլորս կանգնած ենք վճռորոշ ճամփաբաժնի վրա։ Ոչ թե պարզապես մեր հայրենիքի համար հերթական բարօր շրջան ձևավորելու, այլ մեր հայրենիքի գոյության և չգոյության ճամփաբաժնի վրա ենք կանգնած»,-  Ազատության հրապարակում  «Մեր ձևով» ժողովրդական շարժման հանրահավաքին հայտարարեց Հայր Շահե ծայրագույն վարդապետ Անանյանը։

Հայր Սուրբը նշեց, որ սա վճռորոշ է ոչ միայն քաղաքական, ազգային իմաստով, այլ հոգևոր իմաստով. «Դա պետք է գիտակցվի ոչ միայն մեր քաղաքական ուժերի, այլ մեր բոլորի կողմից՝ ներքին գիտակցությամբ և ոգու արժևորումով։

Առանց ոգու ազգը դառնում է գերի ազգ, առանց ապագայի ազգ»։

Այնուհետև Հայր Շահե ծայրագույն վարդապետ Անանյանը հարցադրում արեց. «Հոգևորականներս մի՞թե զբաղվում ենք քաղաքականությամբ։ Այո, զբաղվում ենք, զբաղվում ենք ոգու քաղաքականությամբ, այն քաղաքականությամբ, որը միտված է մեր ոգու, ազգային ոգու արժեքները պահելուն, դրանք վերարծարծելու համար։ Այո, հոգևորականները զբաղվում են քաղաքականությամբ, որովհետև Աստծո արքայությունն այս օրհնյալ երկրի վրա հաստատվում է  միայն մեր ազգային ոգու վերարծարծումից և հաստատումից հետո»։

Հայր Շահե ծայրագույն վարդապետ Անանյանի ելույթն ամբողջությամբ՝ տեսանյութում։