Կարեն Անդրեասյան. Իմ ցանկության մասին տեղյակ եմ պահել ոչ միայն Փաշինյանին, այլև Պետրոս Ղազարյանին

SMS հաղորդագրությամբ ԲԴԽ պաշտոնից ազատված Կարեն Անդրեասյանը, որ հիմա  Միջազգային իրավական հարցերով ՀՀ ներկայացուցիչն է, ԱԺ-ում լրագրողներին ասաց, որ ինքը դեռ 2024-ի գարնանն է Նիկոլ Փաշինյանին հաղորդագրություն ուղարկել՝ հայտնելով, որ այլևս չի ցանկանում պաշտոնավարել։ Նրա խոսքով, այդ մասին նա նույն տարվա ամռանը  հայտարարել է նաև Հանրային հեռուստաընկերությամբ։

«Արդեն 2024-ի նոյեմբերին նույն կապի միջոցով եղել է խնդրանք, և ես հարգել եմ։  Ինձ վարչապետը որպես ԲԴԽ նախագահի երբեք հրահանգներ չի տվել։ Ես իմ ցանկության մասին տեղյակ եմ պահել ոչ միայն գործադիր իշխանության ներկայացուցչին, այլ չորրորդ իշխանության ներկայացուցչին՝ օրինակ, Պետրոս Ղազարյանին»,-ասաց Կ. Անդրեասյանը։

Նա ասաց, որ հանդիպել է նաև օրենսդիր մարմնի ներկայացուցիչների հետ, քննարկել է դատական իշխանության մեջ իր տեսած խնդիրներն ու բարդությունները։

«Անկեղծ ասեմ, ինչ-որ մի պահի հասունացել է այն համոզումը, որ ես չեմ կարող արդյունավետ կերպով շարունակել այն բարեփոխումները, որոնց մասին երազել եմ տարիներ շարունակ»,-ասաց Կ. Անդրեասյանը։

Լրագրողները Անդրեասյանին հիշեցրեցին, որ Եղիշե Կիրակոսյանը հեռացավ Միջազգային իրավական հարցերով ՀՀ ներկայացուցչի պաշտոնից, ըստ տարածված լուրերի, այն պատճառով, որ Հայաստանը որոշել է հետ վերցնել Ադրբեջանի դեմ ներկայացրած հայցերը։ Համաձայնե՞լ է Կ. Անդրեասյանը միջազգային դատարաններից հետ վերցնել հայցերը։

«Ոչ իմ նախորդի, ոչ իմ օրոք հայց հետ չի վերցվել, և նման քննարկում չկա։ Եթե լինի նման քննարկում, ձեզ հաստատ տեղյակ կպահենք»,-ասաց նա։

Լրագրողի դիտարկմանը, որ նախաստորագրված խաղաղության համաձայնագրում կա Ադրբեջանի դեմ ներկայացրած հայցերը հետ կանչելու վերաբերյալ նախապայման, Անդրեասյանն ասաց՝ ուսումնասիրել է ամբողջ փաթեթը, պարոն Կիրակոսյանը, մեր գրասենյակը չի ստացել նման առաջարկ։

«Եթե երբևէ Հայաստանի Հանրապետությունը, ՀՀ կառավարությունը, ՀՀ ԱԺ-ն, ՍԴ-ն որոշեն վավերացնել որևէ համաձայնագիր, որով կորոշի դադարեցնել որևէ իրավական գործընթաց, դուք ինձանից շուտ կծանուցվեք»,-ասաց նա։