Երևանն ու Բաքուն դեռ շատ անելիքներ ունեն երկկողմ հարաբերությունների կարգավորման գործընթացն անշրջելի դարձնելու համար. ՌԴ ԱԳՆ

Ռուսաստանի արտաքին գործերի նախարարությունը հայտարարություն է տարածել Ռուսաստանի, Ադրբեջանի և Հայաստանի ղեկավարների միջև Լեռնային Ղարաբաղի հակամարտության գոտում հրադադարի մասին համաձայնագրի հինգերորդ տարեդարձի կապակցությամբ։

«2025 թվականի նոյեմբերի 9-ին լրանում է Ռուսաստանի Դաշնության նախագահ Վլադիմիր Պուտինի, Հայաստանի Հանրապետության վարչապետ Նիկոլ Փաշինյանի և Ադրբեջանի Հանրապետության նախագահ Իլհամ Ալիևի կողմից Լեռնային Ղարաբաղի հակամարտության գոտում լիակատար հրադադարի և բոլոր ռազմական գործողությունների մասին Հայտարարության ստորագրման հինգ տարին։ Երեք երկրների ղեկավարների միջև ժամեր տևած բանակցությունները վերջ դրեցին արյունահեղությանը և մեկնարկեցին տարածաշրջանում խաղաղություն հաստատելու մի շարք միջոցառումներ»,-ասվում է հայտարարության մեջ։

Հետագայում երեք երկրներն ընդունեցին ևս երեք հայտարարություն։ «Միասին վերցրած՝ չորս բարձր մակարդակի հայտարարությունները կազմում են խաղաղության գործընթացի «ճանապարհային քարտեզը»։ Այս համաձայնագրերը մնում են ուժի մեջ և արդիական։ Եռակողմ ձևաչափով ստեղծված կարևոր հիմքերը ակտիվորեն օգտագործվում են ադրբեջանական և հայկական կողմերի կողմից, այդ թվում՝ անմիջական երկխոսության մեջ։ Այս համատեքստում ռուսական կողմը դրականորեն է գնահատել Վաշինգտոնում 2025 թվականի օգոստոսի 8-ին Ադրբեջանի և Հայաստանի Հանրապետության միջև խաղաղության և միջպետական ​​հարաբերությունների հաստատման մասին համաձայնագրի նախագծի նախաստորագրումը»,-հայտարարել է Ռուսաստանի արտաքին գործերի նախարարությունը և հավելել. «Բաքուն և Երևանը դեռ շատ բան ունեն անելու երկկողմ հարաբերությունների կարգավորման գործընթացՆ անշրջելի դարձնելու համար, այդ թվում՝ խաղաղության պայմանագրի ստորագրում, Հարավային Կովկասի բոլոր երկրների և նրանց անմիջական հարևանների շահերից բխող տրանսպորտային և տնտեսական կապերի վերականգնում, պետական ​​սահմանի արդարացի սահմանազատում և սահմանագծում, ինչպես նաև քաղաքացիական հասարակության հետ արդյունավետ կապերի հաստատում։

Ռուսական կողմը պատրաստ է շարունակել իր ադրբեջանցի և հայ գործընկերներին համապարփակ օգնության ցուցաբերումը բոլոր ոլորտներում, այդ թվում՝ 3+3 տարածաշրջանային համագործակցության հարթակի (Ադրբեջան, Հայաստան, Վրաստան, Ռուսաստան, Իրան և Թուրքիա) շրջանակներում»,-նշել է Ռուսաստանի արտաքին գործերի նախարարությունը։