Որ դեպքում դատարանն ազատ կարձակի Սամվել Կարապետյանին. Փաստաբանի պարզաբանումը

«Նախաքննական մարմինը գտնում է, որ Սամվել Կարապետյանի կալանքի  իրավապաչափության պայմանները դեռևս շարունակվում է, այսինքն հիմնավոր կասկածը դեռևս առկա է։ Նաև գտնում են, որ Սամվել Կարապետյանը կարող է ոչ իրավաչափ վարք դրսևորել»,-Հակակոռուպցիոն դատարանի դիմաց հայտարարեց Սամվել Կարապետյանի պաշտպան  Ռուբեն Հակոբյանը։

Նրա դիտարկմամբ, որքան էլ անհեթեթ է այն թվում, ամեն դեպքում նախաքննական մարմնի դիրքորոշումն այդ է։

Նշենք, որ դատարանն այս պահին քննում է Սամվել Կարապետյանի կալանքը հերթական անգամ երկու ամսով երկարաձգելու հարցը։ Այսօր ժամը 16.00-ին դատարանի դիմաց նախատեսված է անցկացնել հավաք՝ ի զորակցությունն 152 օր կալանավորված Սամվել Կարապետյանին:

«Մեր գնահատմամբ, միջնորդությունն ակնհայտ ապօրինի է, բացարձակ չպատճառաբանված, որը որևէ աղերս չունի իրավունքի ու իրավաբանության հետ»,-ասաց Ռ. Հակոբյանը։

Փաստաբանի խոսքով, կոչի դրվագով կալանքի առավելագույն ժամկետը սպառված է, մինչդեռ նախաքննական մարմինը գտնում է, որ տնտեսական բնույթի ենթադրյալ հանցագործություններ են առկա։

«Այսօր դատարանն այդ հարցն էլ պետք է քննարկի։ Եթե գտան, որ այդ տնտեսական ենթադրյալ հանցագործության դրվագներով հիմնավոր կասկած առկա չէ, ապա կալանքի ժամկետը չի կարող երկարաձգվել»,-ասաց նա։