Մեր դասարանի Հովսեփյան Մուրադն ասում էր՝ Սբխեչը Մարտի 8-ը կտրում է. Արթուր Խաչատրյանը՝ Փաշինյանին

«2019 թվականի հունիսին ներկայացված փաստաթղթով ամրագրվում է այն մեխանիզմը, որով ԼՂ ժողովուրդը կարող էր որոշել իր ապագա իրավական կարգավիճակը, որը որևէ սահմանափակման ենթակա չէ։ Նշվում է, որ համաժողովրդական կամարտահայտությունն իրականացնելու է ԼՂ բնակչությունը»,- ԱԺ-Կառավարություն հարցուպատասխանի ժամանակ Փաշինյանին դիմեց «Հայաստան» խմբակցության պատգամավոր Արթուր խաչատրյանը՝ անդրադառնալով նախօրեին Փաշինյանի գաղտնազերծած 2019 թ փաստաթուղթը։

Ընդդիմադիր պատգամավորի պնդմամբ՝ փաստաթղթով դուս են գալիս այն հարցադրումները, թե ո՞վ է ասել, որ հանրաքվեն ԼՂ-ում է տեղի ունենալու կամ ո՞վ ասել, որ օրակարգում կարող է լինել անկախության հարցը, ապաշրջափակվում էր ԼՂ-ն, ժամանակավոր վարչակազմ էր ստեղծվում և ՀՀ-ն դիտվում էր, որպես ԼՂ-ի երաշխավորներից մեկը։

«Ձեր հարցին պատասխանելու համար, ստիպված եմ հղում անել Երուսաղեմում Իսրայելի թագավոր Դավթի որդի Սողոմոնի առակների առաջին համարին, որտեղ բառացիորեն ասվում է. «Ճանաչել իմաստություն և խրատը, ընկալել հանճարի խոսքերը, ընկալել խոսքի բարդ դարձվածքները, հասկանալ ճշմարիտ արդարաությունը և ուղղել իրավունքը, պարզամիտներին խորագիտություն, իսկ երիտասարդներին միտք ու հանճար տալու որպեսզի դրանք լսելով իմաստունն ավելի իմաստուն լինի, իսկ հանճարեղն առաջնորդություն ստանա, թափանցի առակների և խորույն ասույթների մեջ, իմաստունների ճառերի և նրանց այլաբանության մեջ»»,-պատասխանեց Փաշինյանը և բացատրեց, որ մեջբերումն արեց, որպեսզի նշի գրածը կարդալու և հասկանալու կարևորությունը։

Փաշինյանի խոսքով՝ ընդդիմադիր պատգամավորի ասածի ուղիղ հակառակն է գրված փաստաթղթում՝ պնդելով, որ որևէ տեղ գրված չէ, որ հանրաքվեն տեղի էր ունենալու ԼՂ-ում։

Ըստ Փաշինյանի փաստաթղթում գրված է, որ հանրաքվեն տեղի է ունենալու ամբողջ Ադրբեջանի տարածքում, որի մասին ժամանակին դիտարկում է ներկայացրել նաև ՀՀ Երրորդ նախագահ Սերժ Սարգսյանը

«Ես իհարկե, փորձում եմ «ճանաչել զիմաստությունս և զիմանալ զբանս հանճարոյ» ու չեմ մեջբերի Աստվածաշունչը, բայց մեր դասարանի Հովսեփյան Մուրադն ասում էր՝ Սբխեչը Մարտի 8-ը կտրում է։ Դուք սկսել եք բանակցությունները ձեր սեփական կետից, ինչ նամակ է գրել Սերժ Սարգսյանը, ի դեպ մի քանի նամակ է եղել, և ինչ հայտարարություն է արել ԵԱՀԿ գործող նախագահը 1996 թվականից դեկտեմբերից՝ այն մետաֆիզիկա էր։ Այս փաստաթուղթը ստեղծվել է մեծ պայթյունից հետո և այդ իրականության մեջ ձեզ առաջարկվել է մի փաստաթուղթ, որտեղ նշվում է, որ ԼՂ կարգավիճակը ոչնչով սահմանափակված չի լինի»,-ասաց խաչատրյանը և ընդամենը կրկնեց հարցը, թե ինչ է պատասխանել Փաշինյանն այդ առաջարկությանը։

Փաշինյանը չհամաձայնեց Արթուր Խաչատրյանի համադասարանցու հետ, բայց և կրկին չպատասխաբեց, թե  որն է եղել 2019 թվականին իրեն ներկայացված փաստաթղթին իր պատասխանը։