Իրանի փոխնախագահ. Բողոքի ցույցերի ժամանակ մեծ թվով մարդիկ են զոհվել

Վերջին օրերին Իրանում բռնկված բողոքի ցույցերի հետևանքով զոհերի թիվը մեծ է։ «ՌԻԱ նովոստի»-ի փոխանցմամբ, հայտարարել է «Մարտիրոսվածների հիմնադրամի» ղեկավար և Իսլամական Հանրապետության փոխնախագահ Ահմադ Մուսավին։

Երեքշաբթի օրը Reuters-ը, հղում անելով իրանցի պաշտոնյայի, հայտնել էր, որ Իրանում տեղի ունեցած բողոքի ցույցերի հետևանքով զոհվել է մոտ 2000 մարդ։

«Զինված ահաբեկչական խմբավորումների կողմից բռնության մակարդակն այնքան բարձր էր, որ երկիրը մեծ կորուստներ կրեց (բնակչության շրջանում)»,- Մուսավիի խոսքերն է մեջբերում IRIB լրատվական գործակալությունը։

Փոխնախագահը ընդգծել է այն դաժանությունը, որով մարդիկ սպանվել են, և օգտագործված զենքերի բազմազանությունը։ Նա չի նշել զոհերի թիվը։

Մուսավին նաև ասել է, որ մահացածների ընդհանուր թվի երկու երրորդը «Մարտիրոսված» են, տերմին, որն Իրանի իշխանությունները օգտագործում են ահաբեկչական հարձակումների զոհ դարձած կամ պետական ​​պարտականությունները կատարելիս մահացած անձանց նկարագրելու համար։

Իրանում բողոքի ցույցերը սկսվել են 2025 թվականի դեկտեմբերի վերջին՝ տեղական արժույթի՝ իրանական ռիալի արժեզրկման պատճառով։ Հունվարի 8-ից՝ 1979 թվականին տապալված Իրանի շահի որդու՝ Ռեզա Փահլավիի կոչերից հետո, Իրանում բողոքի երթերը սրվել են։ Նույն օրը երկրում անջատվել է ինտերնետը։ Իրանի մի քանի քաղաքներում բողոքի ցույցերը վերածվել են ոստիկանության հետ բախումների և ուղեկցվել են Իրանի քաղաքական համակարգի դեմ վանկարկումներով։ Զոհեր են գրանցվել ինչպես անվտանգության ուժերի, այնպես էլ ցուցարարների շրջանում։ Իրանի իշխանությունները, որոնք մեղադրել են ԱՄՆ-ին և Իսրայելին անկարգությունները կազմակերպելու մեջ, հունվարի 12-ին հայտարարեցին, որ իրավիճակը վերահսկողության տակ է վերցվել։