Որո՞նք են կրծքագեղձի այն փոփոխությունները, որոնք չի կարելի անտեսել

Որո՞նք են կրծքագեղձի այն փոփոխությունները, որոնք չի կարելի անտեսել: Այս հարցին պատասխանել է Հայ-ամերիկյան առողջության կենտրոնի ուռուցքաբան-վիրաբույժ Լիլիթ Ջանգուլյանը:

«Կրծքագեղձերում ցանկացած արտասովոր փոփոխություն պահանջում է ուշադրություն և անհապաղ արձագանք, մասնավորապես` անհրաժեշտ է դիմել մասնագետի, եթե նկատում եք հետևյալ նշաններից որևէ մեկը․

- շոշափվող գոյացություն, կոշտացում, ցավ,

- պնդություն կամ լցվածության զգացում, որը տարբերվում է սովորականից,

- մաշկի տեսքի փոփոխություն՝ կարմրություն, արտափքում, այտուցվածություն, կնճռոտում, «կիտրոնի կեղև»,

- պտուկի փոփոխություններ՝ ներս ընկնել, գույնի կամ ձևի փոփոխություն, արտադրություն պտուկից,

- անութափոսերում շոշափվող ավշային հանգույցներ,

- անհամաչափություն կրծքագեղձերի միջև:

Սիրելի՛ կանայք, հետևե՛ք Ձեր առողջությանը, հիշե՛ք, որ տարեկան հետազոտությունները հնարավորություն են տալիս հայտնաբերել քաղցկեղը նախնական փուլում, իսկ վաղ փուլերում հայտնաբերված հիվանդությունները հանգեցնում են արդյունավետ բուժման՝ խուսափելով հետագա խնդիրներից և բարդություններից»,- նշել է մասնագետը։