WSJ. Սպիտակ տունը կաջակցի Իրանի նոր առաջնորդի սպանությանը, եթե նա զիջումների չգնա

Իսրայելը, ԱՄՆ աջակցությամբ, կարող է մահափորձ պլանավորել Իրանի նոր գերագույն առաջնորդ Մոջթաբա Խամենեիի դեմ, ով համարվում է փոխզիջման գնալու պատրաստակամություն չունեցող քաղաքական գործիչ: Այս մասին հայտնել է The Wall Street Journal (WSJ)-ը՝ հղում անելով ԱՄՆ ներկայիս և նախկին պաշտոնյաներին:

ԱՄՆ նախագահ Դոնալդ Թրամփը իր խորհրդականներին ասել է, որ կաջակցի Մոջթաբա Խամենեիին վերացնելու գաղափարին, եթե պատրաստ չէ զիջումների գնալ Միացյալ Նահանգներին: Մասնավորապես, Թրամփը կցանկանար, որ Իրանը հրաժարվի իր միջուկային ծրագրից նոր առաջնորդի օրոք։

Սակայն Վաշինգտոնը Խամենեիին համարում է կոշտ քաղաքական գործիչ և չի սպասում, որ նա կհրաժարվի «Իրանի միջուկային զենքի ձգտումից» կամ կբանակցի Միացյալ Նահանգների հետ բարենպաստ պայմաններով, գրում է թերթը։

Թերթի աղբյուրները ենթադրել են, որ Իսրայելը կարող է իրականացնել Խամենեիին վերացնելու գործողությունը: Հենց Իսրայելն էր, ըստ հրատարակության, իրականացրել ավիահարվածը, որի հետևանքով զոհվել էին Մոջթաբա Խամենեիի հայրը՝  Իրանի նախկին գերագույն առաջնորդը, և նրա կինը։

Մարտի 8-ին ABC News-ին տված հարցազրույցում Թրամփը պնդել է, որ Իսլամական Հանրապետության հաջորդ գերագույն առաջնորդը «երկար չի դիմանա» առանց Վաշինգտոնի հաստատման։

Փետրվարի 28-ին Միացյալ Նահանգները և Իսրայելը ռազմական գործողություն սկսեցին Իրանի դեմ: Երկրի խոշորագույն քաղաքները, այդ թվում՝ Թեհրանը, հարձակման ենթարկվեցին: Սպիտակ տունը արդարացրեց հարձակումը՝ հղում անելով Իրանից ենթադրաբար եկող հրթիռային և միջուկային սպառնալիքներին։ Հարվածների հետևանքով սպանվեցին Ալի Խամենեին և Իրանի ղեկավարության մի քանի այլ կարևոր դեմքեր: Իսլամական հեղափոխության պահապանների կորպուսը (Իրանի զինված ուժերի էլիտար ստորաբաժանումը) հայտարարեց լայնածավալ պատասխան գործողության մասին՝ հարձակվելով Իսրայելում գտնվող թիրախների վրա: Հարվածներ են հասցվել նաև Բահրեյնում, Հորդանանում, Կատարում, Քուվեյթում, ԱՄԷ-ում և Սաուդյան Արաբիայում գտնվող ամերիկյան թիրախներին: