Թուրքական ջարդերի ժամանակ շատ հայեր փորձել են իրենց կյանքը փրկել եկեղեցիներում, բայց չի հաջողվել, նույնը հիմա Հայաստանում է. Պետրոսյան

«Հայաստանում խոսք, կարծիք արտահայտելու ազատություն չկա, նույնիսկ եկեղեցում պաշտպանված չես»,-Սուրբ Աննա եկեղեցու դիմաց կազմակերպած ակցիայի ժամանակ ասաց «ՀայաՔվե» ազգային քաղաքացիական նախաձեռնության անդամ Արամ Պետրոսյանը։

«ՀայաՔվե»-ի երիտասարդ անդամները կապել էին իրենց ձեռքերը և փակել բերաններն՝ ի նշան 18-ամյա Դավիթ և Միքայել Մինասյանների դեմ բռնության և կալանավորման։

Պետրոսյանը հիշեցրեց, որ ժամանակին՝ թուրքական ջարդերի ժամանակ շատ հայեր փորձել են իրենց կյանքը փրկել եկեղեցիներում, բայց չի ստացվել, նույնը հիմա է  Հայաստանում։

«Այսօր դու կարող ես եկեղեցում խաղաղ կանգնել, գան քեզ հրեն, հետո հայտնվես բանտում և հաշվի չառնեն ոչ քո տարիքը, ոչ առողջական վիճակը»,- ասաց«ՀայաՔվե»-ի անդամը։

 Նա հայտնեց, որ Դավիթի փոխարեն յուրաքանչյուրը կարող է լինել՝ հիշեցնելով, որ նախորդ օրնա էլ Նիկոլ Փաշինյանի այցն ապահովող Ոստիկանության գվարդիայի ավտոբուսը մահվան պատճառ դարձավ՝ ավտովթարին մասնակցելով։

«Մարդ, որը կարող է սեփական եկեղեցին պղծել, սեփական հայրենիքից հրաժարվել, հանուն նրա, որ կարողանա իր աթոռը պաշտպանի՝ նրա և նրա թիմակիցների հայտարարություններին գնահատական տալը հարիր չէ հայրենասեր մարդկանց»,- ասաց Պետրոսյանը։