Կոնգոյի արևելքում шպստшմբների հшրձшկումները խլել են 30 մարդու կյանք և խոչընդոտել Էբոլայի դեմ պայքարին

Կոնգոյի Դեմոկրատական Հանրապետության արևելքում շարունակվող զինված բռնությունները լրջորեն խոչընդոտում են Էբոլայի համաճարակի դեմ պայքարին։ Վերջին օրերին Հյուսիսային Կիվու նահանգի Բենի քաղաքի և հարակից գյուղերի վրա իրականացված հարձակումների հետևանքով զոհվել է ավելի քան 30 մարդ։

Տեղական իշխանությունների տվյալներով՝ հարձակումների պատասխանատվությունը վերագրվում է Դաշնակից դեմոկրատական ուժեր(ADF) խմբավորմանը, որը գործում է Կոնգոյի արևելքում և կապվում է Իրանի հետ։ Չորեքշաբթի առավոտյան Մատետե, Մամուլի և Կիտոհո գյուղերում իրականացված հարձակումների հետևանքով առնվազն 10 մարդ է սպանվել, այրվել են տներ և տրանսպորտային միջոցներ, իսկ մի շարք բնակիչներ առևանգվել են։

Սակայն բռնությունների ազդեցությունը չի սահմանափակվում միայն անվտանգության ոլորտով։ Տարածաշրջանը համարվում է նաև էբոլայի բռնկման հիմնական օջախներից մեկը։ Նահանգային իշխանությունները հայտնել են, որ վերջին հարձակումներից հետո Էբոլայով վարակված երեք հիվանդ փախել է բուժհաստատություններից, ինչը մտահոգություններ է առաջացրել հիվանդության հետագա տարածման վերաբերյալ։

Տեղի բնակիչների խոսքով՝ հարձակումները բնակչության շրջանում խուճապ են առաջացրել, և հարյուրավոր մարդիկ ստիպված են եղել լքել իրենց տները։ Մասնագետները զգուշացնում են, որ մարդկանց զանգվածային տեղաշարժը դժվարացնում է հիվանդների հայտնաբերումն ու մեկուսացումը և մեծացնում վարակի տարածման ռիսկը։

Համաճարակի դեմ պայքարը բարդանում է նաև առողջապահական աշխատողների անվտանգության խնդիրների պատճառով։ Առողջապահության համաշխարհային կազմակերպության գլխավոր տնօրենը հայտարարել է, որ անապահով միջավայրը լրջորեն խոչընդոտում է համաճարակի վերահսկման աշխատանքներին՝ ընդգծելով, որ արդյունավետ արձագանք կազմակերպելը դժվար է, երբ տարածաշրջանում շարունակվում են զինված բախումները։

Վերլուծաբանների կարծիքով՝ Կոնգոյի և Ուգանդայի զինված ուժերի կողմից ապստամբների դեմ իրականացվող ռազմական գործողությունները հաճախ ուղեկցվում են քաղաքացիական բնակչության դեմ նոր հարձակումներով։ Այդ պայմաններում տարածաշրջանը շարունակում է բախվել միաժամանակ երկու ծանր մարտահրավերի՝ զինված հակամարտության և հանրային առողջապահական ճգնաժամի։