«Ժողովուրդ». Ինչ ունեցվածք ունի շրջակա միջավայրի նախարար Համբարձում Մաթևոսյանը

«Ժողովուրդ» թերթը գրում է.

«Օրաթերթը ուսումնասիրել է ՀՀ շրջակա միջավայրի նախարար Համբարձում Մաթևոսյանի՝ տարբեր տարիներին ներկայացրած հայտարարագրերը՝ հասկանալու, թե ինչ գույք, դրամական միջոցներ, եկամուտներ և պարտավորություններ է ունեցել պաշտոնյան պետական տարբեր պաշտոններ զբաղեցնելու ընթացքում։

Համբարձում Մաթևոսյանը մասնագիտական գործունեությունը սկսել է արտերկրում։ 2011-2012 թվականներին աշխատել է ԱՄՆ Կալիֆոռնիայի Գրոսմոնտ քոլեջի միջազգային ուսանողական բաժնի համակարգող, 2013-2014 թվականներին՝ Ուկրաինայի Դոնեցկ քաղաքի «Կերամռեսուրս» ՍՊԸ-ում՝ Եվրոպական շուկայի պատասխանատու, իսկ 2013-2015 թվականներին եղել է Ուկրաինայի Դոնեցկ քաղաքում Հայաստանի Հանրապետության պատվավոր հյուպատոսի խորհրդական։ 2016-2018 թվականներին զբաղեցրել է Հայաստանի ամերիկյան համալսարանի հումանիտար և հասարակական գիտությունների ֆակուլտետի կառավարիչ, ընդհանուր կրթության գծով խորհրդականի պաշտոնը։ 2018-2021 թվականներին եղել է Արմավիրի մարզպետ, 2021-2022 թվականներին՝ ՀՀ փոխվարչապետ, 2023-2025 թվականներին՝ վարչապետի գլխավոր խորհրդական, իսկ 2025 թվականի հուլիսի 16-ից նշանակվել է շրջակա միջավայրի նախարար։ Նա «Քաղաքացիական պայմանագիր» կուսակցության անդամ է։

2025 թվականի տարեկան հայտարարագրի համաձայն՝ Համբարձում Մաթևոսյանը համասեփականության իրավունքով տնօրինում է Երևանում մեկ բնակարան։ Նա բնակարանի 1/2 բաժնեմասի սեփականատերն է, որը ձեռք է բերել 2017 թվականի մայիսի 17-ին՝ գնման եղանակով։

Նախարարը շարունակում է ունենալ «Փայտամշակ» ՓԲԸ-ի նկատմամբ 11.7 տոկոս տոկոսադրույքով հիփոթեքային փոխառություն։ Բանկային հաշիվներում տարվա սկզբին առկա է եղել 1 մլն 354 հազար 203 դրամ, իսկ տարեվերջին՝ 9 մլն 291 հազար 947 դրամ։ Կանխիկ դրամական միջոցները տարվա սկզբին և ավարտին կազմել են 2 մլն դրամ։

2025 թվականի ընթացքում նախարարի ընդհանուր եկամուտը կազմել է 24 մլն 908 հազար 788 դրամ։ Դրանից 15 մլն 259 հազար 717 դրամը ստացվել է Շրջակա միջավայրի նախարարությունից՝ որպես աշխատավարձ, 6 մլն 715 հազար 800 դրամը՝ վարչապետի աշխատակազմից ստացած աշխատավարձ, իսկ 2 մլն 933 հազար 271 դրամը՝ եկամտային հարկի վերադարձի շրջանակում։

2024 թվականի հայտարարագիրը ներկայացնելու պահին Համբարձում Մաթևոսյանը զբաղեցնում էր վարչապետի գլխավոր խորհրդականի պաշտոնը։ Տարվա սկզբի և ավարտի դրությամբ նա շարունակել է ունենալ Երևանի բնակարանի 1/2 բաժնային սեփականությունը, որը ձեռք է բերել 2017 թվականի մայիսի 17-ին։ Տարվա ընթացքում անշարժ գույք չի ձեռք բերել և չի օտարել։ Կանխիկ միջոցների մասով տարվա սկզբին հայտարարագրվել էր 20 հազար ԱՄՆ դոլար և 5 մլն դրամ, իսկ տարվա վերջում դրանք փոխարինվել են 2 մլն դրամ կանխիկով։

2024 թվականի ընդհանուր եկամուտը կազմել է 10 մլն 193 հազար 100 դրամ։ Հիփոթեքային վարկի մայր գումարի մնացորդը տարվա վերջում կազմել է 29 մլն 845 հազար 410 դրամ։

2023 թվականին, պաշտոնը ստանձնելու հայտարարագրով Համբարձում Մաթևոսյանի բանկային հաշվում առկա է եղել 4 մլն 425 հազար 828 դրամ։

Բացի այդ, պաշտոնը ստանձնելու պահին հայտարարագրվել է 5 մլն դրամ և 20 հազար ԱՄՆ դոլար կանխիկ միջոց»։

Մանրամասները թերթի այսօրվա համարում