Արքայազն Հարրին պարտվել է Associated Newspapers-ի դեմ դատական գործում

Սասեքսի դուքս արքայազն Հարրին և ևս վեց հայցվորներ պարտվել են Associated Newspapers-ի՝ Daily Mail և Mail on Sunday թերթերի հրատարակչի դեմ հարուցված գաղտնիության խախտման դատական գործով։ Այս մասին հայտնում է BBC-ն։ 

Բարձրագույն դատարանի դատավորը վճռել է, որ հայցվորները չեն կարողացել ապացուցել, թե թերթը հոդվածների համար տեղեկատվություն է ձեռք բերել անօրինական ճանապարհով։ Նրա խոսքով, կասկածները, որքան էլ հասկանալի լինեն, չեն կարող համարվել ապացույց։

Հայցվորների թվում էին նաև Դորին Լոուրենսը, դերասանուհիներ Էլիզաբեթ Հերլին և Սեդի Ֆրոստը, երգիչ Էլթոն Ջոնը և նրա ամուսին Դեյվիդ Ֆըրնիշը, ինչպես նաև նախկին նախարար  Սայմոն Հյուզը։ Նրանք պնդում էին, որ Associated Newspapers-ը տարիներ շարունակ կիրառել է անօրինական մեթոդներ՝ անձնական տեղեկատվություն ստանալու համար, սակայն հրատարակիչը հետևողականորեն հերքել է այդ մեղադրանքները։

436 էջանոց դատավճռում դատավորը  նշել է, որ յուրաքանչյուր պնդում գնահատվել է առանձին, և ապացույցները բավարար չեն եղել մեղադրանքները հաստատելու համար։ Նա նաև ընդունել է Associated Newspapers-ի լրագրողների բացատրությունները հոդվածների աղբյուրների վերաբերյալ և եզրակացրել, որ հայցվորները չեն ապացուցել նաև, թե ընկերության նախկին ու ներկա ղեկավարները  հետաքննության ընթացքում սուտ ցուցմունքներ են տվել։

Դատավճռից հետո արքայազն Հարրին և Լոուրենսը համատեղ հայտարարությամբ նշել են, որ դատարան էին եկել արդարադատություն և պատասխանատվություն պահանջելու, սակայն չեն ստացել ոչ մեկը, ոչ մյուսը։ Իր հերթին Associated Newspapers-ի խոսնակը որոշումը անվանել է Daily Mail-ի և նրա լրագրողների համար ջախջախիչ հաղթանակ՝ ընդգծելով, որ դատարանը մերժել է ներկայացված բոլոր 97 մեղադրանքները։

Այս գործը Հարրիի կողմից բրիտանական մամուլի դեմ իրականացվող մի շարք դատական հայցերից վերջինն է։ Ավելի վաղ նա հաջողության էր հասել Mirror Group Newspapers-ի դեմ ներկայացված հայցերում, իսկ The Sun-ի հրատարակիչը համաձայնել էր վճարել զգալի փոխհատուցում և ներողություն խնդրել։ Դատավճիռը հրապարակվել էր այն օրը, երբ արքայազն Հարրին Լոնդոնում մասնակցում էր Invictus Games-ի միջոցառումներին։