Որո՞նք են 2026 թվականին արձակուրդ վերցնելու ամենաշահավետ ամիսները

2026 թվականին արձակուրդ պլանավորող աշխատողների համար առավել շահավետ ամիսներն են  ապրիլը, հուլիսը, սեպտեմբերը, հոկտեմբերը և դեկտեմբերը։ Այս ամիսներին աշխատանքային օրերի քանակն ավելի մեծ է, ինչի շնորհիվ արձակուրդ վերցնելիս աշխատավարձի հնարավոր կորուստը նվազում է։ Այս մասին Գազետա.ռու-ին հայտնել է Ռուսաստանի ֆինանսների նախարարության Ֆինանսական հետազոտությունների գիտահետազոտական ինստիտուտի և «Moifinansy.rf» նախագծի ֆինանսական գրագիտության վարչության ղեկավար Դմիտրի Մոդելը։

Նրա խոսքով, արձակուրդային վճարը հաշվարկվում է վերջին 12 ամիսների միջին օրական աշխատավարձի հիման վրա, մինչդեռ աշխատավարձը կախված է տվյալ ամսվա աշխատանքային օրերի քանակից։ Հետևաբար, որքան շատ աշխատանքային օրեր ունի ամիսը, այնքան ֆինանսապես ավելի ձեռնտու է այդ ժամանակահատվածում արձակուրդ վերցնելը։

Փորձագետը հիշեցրել է, որ օրենքով սահմանված ամենամյա վճարովի արձակուրդի նվազագույն տևողությունը 28 օրացուցային օր է։ Չօգտագործված արձակուրդային օրերը չեն կորչում․ աշխատանքային հարաբերությունների դադարեցման դեպքում դրանց դիմաց աշխատողին վճարվում է համապատասխան փոխհատուցում։

Միաժամանակ նա ընդգծել է, որ դրամական փոխհատուցում հնարավոր է ստանալ միայն այն արձակուրդային օրերի համար, որոնք գերազանցում են օրենքով նախատեսված 28 օրացուցային օրը։ Սակայն նույնիսկ այս դեպքում գործատուն կարող է հրաժարվել նման փոխհատուցում տրամադրելուց։

Փորձագետի խոսքով, աշխատողը սովորաբար վճարովի արձակուրդի իրավունք է ստանում նույն գործատուի մոտ առնվազն վեց ամիս աշխատելուց հետո։ Այնուամենայնիվ, որոշ աշխատողների համար օրենքը նախատեսում է բացառություններ․ օրինակ՝ հղի կանայք, անչափահաս աշխատողները և մինչև երեք ամսական երեխա որդեգրած ծնողները կարող են արձակուրդ վերցնել ավելի վաղ՝ իրենց համար հարմար ժամանակահատվածում։

Դմիտրի Մոդելը նաև խորհուրդ է տվել, որ եթե գործատուն հրաժարվում է տրամադրել օրենքով սահմանված արձակուրդը, ուշացնում է արձակուրդային վճարները կամ չի կատարում այլ պարտադիր վճարումներ, աշխատողը կարող է դիմել Աշխատանքի տեսչություն՝ իր իրավունքները պաշտպանելու համար։