Քուինսում պաշտամունքի վայրերի վրա Մոլոտովի կոկտեյլներ նետելու կասկածանքով տղամարդ է ձերբակալվել

Քուինսում երկու տարբեր պաշտամունքային վայրերի և մեկ այլ շենքի վրա Մոլոտովի կոկտեյլներ նետելու համար ձերբակալվել է մի տղամարդ՝ հայտնում է abcnews-ը՝ հղում անելով տեղի ոստիկանությանը։

Ժամը 23:35-ի սահմաններում ոստիկանները արձագանքել են Օզոն Պարկի Իգլեսիա Բաուտիստա Էլ Մեսիաս եկեղեցում ստացված  ահազանգին, որում հաղորդվել է, որ մի տղամարդ, ենթադրաբար, նետել է հրկիզող սարք։

Տեսախցիկների տեսագրություններում երևում է, թե ինչպես է կասկածյալը վառում Մոլոտովի կոկտեյլը և նետում այն եկեղեցու վրա։ Սարքը պայթել է գետնին, իսկ տղամարդը հեռացել է դեպքի վայրից։ Նյու Յորքի հրշեջ ծառայությունը մարել է հրդեհը։ Ոստիկանության տվյալներով՝ ոչ ոք չի տուժել, իսկ շենքը էական վնաս չի կրել։

Եկեղեցու հովիվ Ալեքս Գարսիան հայտնել է, որ պաշտամունքի տունը գործում է արդեն 20 տարի։ «Մենք թշնամիներ չունենք, ուստի չգիտեմ՝ որտեղից է սա գալիս», - ասել է նա։

Հետաքննիչների տվյալներով՝ 36-ամյա կասկածյալը, այնուհետև, ենթադրաբար, գնացել է դեպի Եհովայի վկաների սրահ և ևս մեկ Մոլոտովի կոկտեյլ է վառել ու նետել այդ պաշտամունքային վայրի վրա։

Ոստիկանության տվյալներով՝ այդ վայրում վնասների կամ վիրավորների մասին տեղեկություններ չեն հաղորդվել։ Քննիչները նաև պարզել են, որ կասկածյալը, ենթադրաբար, ևս մեկ Մոլոտովի կոկտեյլ է նետել տարածքի երրորդ շենքի վրա, որը նույնպես չի վնասվել, և որտեղ ևս վիրավորներ չեն եղել։

Ոստիկանությունը հայտնել է, որ ձերբակալության պահին կասկածյալի մոտ եղել է պայուսակ՝ երկու այլ Մոլոտովի կոկտեյլներով։

Նյու Յորքի ոստիկանության տվյալներով հետաքննությունը շարունակվում է։