Հնդկաստանի կառավարությունը խոստանում է բարեփոխել կրթական համակարգը Դելիում տեղի ունեցած անկարգություններից հետո

Հնդկաստանի վարչապետ Նարենդրա Մոդին կոչ է արել երկրում ձևավորել անթերի և վստահելի քննությունների համակարգ՝ ընդգծելով, որ երիտասարդների ապագան չպետք է վտանգվի՝ հայտնում է Reuters-ը։

Վարչապետի հայտարարությունը հնչել է այն բանից հետո, երբ Դելիում շարունակվել են բողոքի ակցիաները՝ պայմանավորված ընդունելության քննությունների թեստերի արտահոսքով, որը, ըստ պաշտոնական տվյալների, ազդել է ավելի քան 2 միլիոն ուսանողի վրա։

Խորհրդարանական գործերի նախարար Կիրեն Ռիջիջուի փոխանցմամբ՝ Մոդին նշել է, որ կառավարությունն անհապաղ միջոցներ է ձեռնարկել քննությունների խախտումների վերաբերյալ տեղեկություններ ստանալուց հետո։ Նրա խոսքով՝ արդեն ձերբակալվել է 13 մարդ, անցկացվել է կրկնակի քննություն, իսկ արդյունքների հրապարակումը չի ուշացել։ Վարչապետը նաև ընդգծել է, որ անհրաժեշտ է խստորեն պատժել մեղավորներին և ստեղծել այնպիսի համակարգ, որը կբացառի նման խախտումների կրկնությունը։

Մինչ այդ Դելիում հազարավոր երիտասարդներ բողոքի երթ էին անցկացրել դեպի խորհրդարան՝ պահանջելով կրթության նախարար Դհարմենդրա Պրադհանի հրաժարականը։ Երթի ընթացքում ցուցարարների և ոստիկանության միջև բախումներ են տեղի ունեցել։ Ոստիկանության տվյալներով՝ վիրավորվել է շուրջ 180 մարդ, այդ թվում՝ անվտանգության ուժերի աշխատակիցներ և ցուցարարներ։ Ցուցարարները պնդում են, որ տուժածների թիվն ավելի մեծ է, իսկ ոստիկանությունը կիրառել է մահակներ և արցունքաբեր գազ։

Բողոքի շարժումը գլխավորող CJP կուսակցության հիմնադիր Աբհիջիտ Դիպկեն հայտարարել է, որ առայժմ չեն վերսկսի երթերը դեպի խորհրդարան՝ նոր բախումներից խուսափելու նպատակով։ Նրա խոսքով՝ հատկապես տուժել են կին ցուցարարները, ինչի համար նա ներողություն է խնդրել իր համախոհներից։ Միևնույն ժամանակ Դելիի ոստիկանությունը պնդում է, որ ցուցարարները խախտել են գործող սահմանափակումները և դրսևորել ագրեսիվ վարքագիծ։

Շարժումը նոր թափ է ստացել ակտիվիստ Սոնամ Վանգչուկի աջակցությունից հետո։ Դելիի Բարձրագույն դատարանը երեքշաբթի թույլատրել է նրան պետական հիվանդանոցից տեղափոխել մասնավոր բուժհաստատություն, ինչը ցուցարարների հիմնական պահանջներից մեկի իրականացումն է։ Բողոքողները շարունակում են պահանջել նաև կրթության նախարարի հրաժարականը, Վանգչուկի լիարժեք ազատ արձակումը և փոխհատուցում այն ուսանողների ընտանիքներին, որոնք, ըստ նրանց, քննությունների արտահոսքի հետևանքով տուժել են։ Շարժումը, որը սկզբում սկիզբ էր առել սոցիալական ցանցերում, այժմ դարձել է երիտասարդ հնդիկների դժգոհության խորհրդանիշ՝ արտացոլելով կրթական համակարգի թափանցիկության և հնարավորությունների շուրջ կուտակված խնդիրները։