ԱՇՆԱՆԸ ԿՈՒՆԵՆԱՆՔ ԿՐԹՈՒԹՅԱՆ ՈՐԱԿԻ ԱԶԳԱՅԻՆ ԾԱՌԱՅՈՒԹՅՈՒՆ

«Այս տարի աշնանից Հայաստանում կսկսի գործել կրթության որակի ազգային ծառայություն»,- մեզ հետ զրույցում տեղեկացրեց կրթության և գիտության նախարար Լևոն Մկրտչյանը: Նրա խոսքով, կրթության որակի ազգային ծառայության հիմնական նպատակը նախապայմաններ ստեղծելն է, որպեսզի Հայաստանը կարողանա մտնել եվրոպական կրթական որակի ռեգիստր: Լ. Մկրտչյանի խոսքով, բուհերն իրականացնելու են ինքնավերլուծություն և ինքնագնահատում, որից հետո որակի ազգային ծառայությունը կստուգի ինքնագնահատման համապատասխանությունը մեր ազգային չափանիշներին:

Արդյունքում կձևավորվի մասնագիտական կրթական համակարգի ռեյտինգային ցանկ, ապա եվրոպացի փորձագետները մոնիտորինգի կենթարկի մեր կրթական համակարգն ու կգնահատեն` արդյոք մեր մասնագիտական կրթական համակարգը պատրա՞ստ է մտնելու եվրոպական կրթական որակի ռեգիստր: Լ. Մկրտչյանը նշեց, որ ստուգումներից հետո համալսարանները կդասակարգվեն և կստանան որակի աստիճաններ: Նախարարի խոսքով, մինչև եվրոպակա կրթական որակի ռեգիստրի մեջ մտնելը սակայն, մենք պետք է ունենանք եվրոպական բոլոր պահանջներին համապատասխան կրթական համակարգ: