ՍԵՊՏԵՄԲԵՐԻ ՄԵԿԻՆ` ԱՆԴՊՐՈՑ

Այս նոր ուսումնական տարում երևանյան հինգ դպրոցներ իրենց դռները չեն բացի աշակերտների առջև: «Լինսի» շինարարական ծրագրով դրանք հիմնանորոգվում են: Panorama.am-ի թղթակցի հետ զրույցում քաղաքապետարանի կրթության վարչության պետի տեղակալ Սիլվա ԱՉՈՅԱՆԸ նկատեց, որ նշված հինգ դպրոցներում, ճիշտ է, դասեր չեն կազմակերպվի, բայց «դրանց աշակերտները կայցելեն հարևան դպրոցներ` ինչպես նախկինում էր»:

Այսպիսով, վերանորոգվող թիվ 125 դպրոցի աշակերտները սեպտեմբերի մեկին հաճախելու են թիվ 48 դպրոց, թիվ 194 դպրոցի աշակերտները այցելելու են թիվ 68 դպրոց, 168-ինը` թիվ 195, թիվ 80-ինը` 42 և վերջապես թիվ 56 դպրոցի աշակերտները կհաճախեն թիվ 21 դպրոց` իրենց հետ տանելով իրենց ուսուցիչներին և տնօրենին:

«Ի՞նչ անենք, պետք է ստիպված մի քիչ նեղն ընկնենք, որ հետո երեխաները լուսավոր ու գեղեցիկ սենյակներում դասեր անեն», - նշեց տիկին Աչոյանը:

Նա նաև տեղեկացրեց, որ նման նեղ պայմանները կերկարեն մինչև երկրորդ կիսամյակ և հունվարից միայն դասերը կկազմակերպվեն նոր դպրոցներում: Եթե ավելացնենք նաև, որ հարևան դպրոցներում երեխաները կսովորեն երկրորդ հերթով, ապա պարզ կլինի, որ «մի քիչը» այդքան էլ քիչ չէ: