ԱՖՐԻԿՅԱՆ ԺԱՆՏԱԽՏԸ ՀԱՍԵԼ Է ԱՐԱՐԱՏԻ ՄԱՐԶ

Արարատի մարզի Արևաբույր և Բուրաստան համայնքներում սեպտեմբերի 8-ին հայտնաբերվել է 28 հիվանդ խոզ (Արևաբույր գյուղում` 22 և Բուրաստանում` 6 խոզ): Այս մասին տեղեկացնում է փրկարար ծառայությունը: Հիվանդ կենդանիները մշակվել են քլորակրով և թաղվել: Տարածքն ախտահանվել է: Վերցվել են նմուշներ` փորձաքննության համար:

Անասնաբուժական տեսչության պետի տեղակալ Գագիկ Թովմասյանի հավաստմամբ, նախորդ և այս օրվա ընթացքում որևէ այլ բնակավայրում խոզերի շրջանում հիվանդության դեպքեր չեն գրանցվել: Այսպիսով, մինչ օրս խոզերի շրջանում աֆրիկյան ժանտախտի դեպքեր գրանցվել են Լոռիում, Տավուշում, Երևանում և Արարատում: