«ՀԱՅՏԵՔ» ՄԻՋԱՆԿՅԱԼ ԿՈՆԳՐԵՍԸ` 2008-ԻՆ

Հայկական տեխնոլոգիաների ՀԱՅՏԵՔ առաջին միջազգային միջանկյալ կոնգրեսը տեղի կունենա 2008-ի հունիսին: Այդ մասին այսօրվա ասուլիսում տեղեկացրեց «Վիասֆեր» տեխնոպարկի տնօրեն Արամ Վարդանյանը: Նրա խոսքով, կոնգրեսի կազմակերպման միտքը հղացել է ՀԱՅՏԵՔ-2007 կոնգրեսի արդյունքներն ամփոփելու արդյունքում: «Հայ և այլազգի  մասնագետների միջև կապն անպայման պետք է զարգացնել, որին էլ միտված են լինելու պարբերաբար անցկացվող կոնգրեսները», - նշեց Վարդանյանը:

Նա նաև տեղեկացրեց, որ ՀԱՅՏԵՔ-2007-ի մասնակիցները որոշել են, թե ինչպես են զարգացնելու համագործակցությունը ՏՏ ոլորտում գործող ընկերությունների հետ:

Հիշեցնենք, որ ՀԱՅՏԵՔ-2007 կոնգրեսը տեղի է ունեցել այս տարվա հուլիսի 4-7-ը Սան-Ֆրանցիսկոյում: Դրան մասնակցել են ավելի քան 350 ներկայացուցիչներ տարբեր երկրներից: Հայաստանը ներկայացրել է 60 բիզնեսմեն և ՏՏ ոլորտը ներկայացնող 11 ընկերութուն: