ԵՐԵԽԱՆԵՐԻ ԻՐԱՎՈՒՆՔՆԵՐԻ ՄԱՍԻՆ ԿՊԱՏՄԵՆ ՀԵՔԻԱԹՆԵՐԻ ՀԵՐՈՍՆԵՐԸ

Նոյեմբերի 12-ից Հայաստանի երիտասարդ կանանց ասոցիացիան (ՀԵԿԱ) կազմակերպում է այցելություններ Երևանի մանկատներ և հատուկ դպրոցներ: Այս մասին այսօրվա ասուլիսում ասաց ասոցիացիայի նախագահ Լիլիթ Ասատրյանը: Նրա հավաստմամբ, ակցիայի ընթացքում նախատեսվում է այցելել Երևանի 18 մանկատներ ու հատուկ դպրոցներ:

Ծրագրի նպատակն է երեխաներին իրազեկել իրենց իրավունքների մասին ու տալ քաղաքացիական կրթություն: «Այս ամենին մենք ցանկանում ենք հասնել երեխաների համար հասկանալի «լեզվով»»,-նշեց Լ. Ասատրյանը:  Այս ամենը երեխաները կսովորեն տիկնիկներից` ներկայացումների ժամանակ: Լ. Ասատրյանի խոսքով, ներկայացումները կազմակերպելու և ցուցադրելու է ասոցիացիայի «Երիտասարդի թատրոն» ստուդիան: Բեմադրվելու են հայտնի հեքիաթներ, որոնց հերոսները կխոսեն երեխաների իրավունքների մասին: Ըստ ասոցիացիայի նախագահի, միջոցառումներն իրականանում են միայն ասոցիացիայի ներքին միջոցների հաշվին, դրա համար էլ ներառվել են միայն մայրաքաղաքի մանկատներն ու հատուկ դպրոցները: Նրա հավաստմամբ, իրենք մտադիր են հաջորդ տարիներին ընդլայնել միջոցառումների անցկացման շրջանակները: