ԱՅՍՕՐ ՈՒՍԱՆՈՂՈՒԹՅԱՆ ՄԻՋԱԶԳԱՅԻՆ ՕՐՆ Է

Այսօր ինչպես ամբողջ աշխարհում, այնպես էլ Հայաստանում նշվում է ուսանողության միջազգային օրը: Ուսանողության միջազգային տոնը հաստատվել է 1946 թվականի նոյեմբերի 17-ին Պրահայում` ուսանողների համաշխարհային կոնգրեսի ժամանակ: Այն նվիրված է չեխ հայրենասեր ուսանողների հիշատակին, որոնց պատմությունը կապված է 2-րդ Համաշխարհային պատերազմի հետ:

Տոնի առթիվ երեկ վարչապետ Սերժ Սարգսյանը կառավարությունում հանդիպել է հանրապետության երիտասարդության ներկայացուցիչների հետ: Հանդիպման 62 մասնակիցներից 48-ը եղել են մայրաքաղաքի բուհերի «Լավագույն ուսանող» ճանաչված և Երևանի Կենտրոն թաղապետարանի կողմից հուշամեդալով պարգևատրված ուսանողները:

Նշենք, որ այսօր Ազատության հրապարակում կկայանա տոնին նվիրված համերգ, որը կազմակերպել է Կենտրոն թաղապետարանը: Համերգին հանրապետության երգիչ երգչուհիներից բացի կմասնակցի նաև ռուս էստրադային հայտնի երգիչ Դիմա Բիլանը: Համերգի վերջում կլինի մեծ հրավառություն: