ՈՒՐ Է ՀԱՍԵԼ ՎՐԱՑ ՊԱՏԳԱՄԱՎՈՐԻ... «ՉԱՓԱԶԱՆՑՈՒԹՅՈՒՆԸ»

ԵԽԽՎ մոնիտորինգային հանձնաժողովի անդամ, վրացական պառլամենտի պատգամավոր Ելենա Տևդորաձեն վրացական «Մզե» հեռուստաընկերությանը տված հարցազրույցում հայտարարել է, իբր ԵԵԽՎ պառլամենտական ասամբլեայի ձմեռային նիստի ժամանակ հայկական կողմը պահանջել է քննարկել Վրաստանում տարածքային հակամարտությունները, ինչպես նաև պահանջել է քննարկման ժամանակ Աբխազիայի և Հարավային Օսիայի դե-ֆակտո նախագահներ Սերգեյ Բագապշի և Էդուարդ Կոկոյտի ներկայությունը:

Այս առնչությամբ ԵԽԽՎ հայկական պատվիրակության ղեկավար, մոնիթորինգային հանձնաժողովի անդամ Դավիթ Հարությունյանը հայտարարում է. «Նախ` Փարիզում տեղի ունեցած ԵԽԽՎ ձմեռային նիստի ժամանակ հայկական պատվիրակությունը` Վրաստանի տարածքային հակամարտությունների քննարկման մասին երբեք ոչինչ չի պահանջել: Իրականում Փարիզում անցկացվում էր ԵԽԽՎ մոնիթորինգային հանձնաժողովի նիստը, իսկ օրակարգի հարցերից մեկն էլ հանձնաժողովի գործունեության շարունակությունն էր «սառեցված» հակամարտությունների ուղղությամբ` հաշվի առնելով 2007 թվականի Բեռլինյան համաժողովի դրական գնահատականի հանգամանքը: Մասնավորապես քննարկվում էր պարբերական լսումների կազմակերպման հարցը` նվիրված Լեռնային Ղարաբաղի, Աբխազիայի, Հարավային Օսիայի և Պրեդնեստրովայի կոնֆլիկտների խաղաղ կարգավորմանը:

Երկրորդը` փաստաթղթի նախագծում, որը պատրաստել էր հանձնաժողովի քարտուղարությունը, կար դրույթ այն մասին, որ հանձնաժողովը կարող է քննարկել հակամարտության խաղաղ կարգավորմամբ շահագրգիռ կողմերի` ներգրավման նպատակահարմարությունը, այդ թվում` հասարակության ներկայացուցիչների մասնակցությամբ: Հայկական կողմը համաձայնել է այս մոտեցմանը, հաստատելով, որ կողմերի հրավերը լսումներին նպատակահարմար է, ինչպես նաև վստահություն է հայտնել, որ նրանց մասնակցությունը լսումներին կնպաստի բանակցությունների արդյունավետությանը և վստահության և միմյանց հասկանալու մթնոլորտ կստեղծի:

Ի զարմանս և ափսոսանք ինձ, իմ կողմից արտահայտված մոտեցումը անճանաչելիորեն փոխվել և խեղաթյուրվել է տիկին Տևդորաձեի կողմից: Կարծում եմ նման խեղաթյուրումները չեն գտնվում կառուցողական հունի մեջ և չեն համապատասխանում մեր երկրների միջև բարեկամական հարաբերություններին»: