ՀԱՅ ԲԱՐԻՏՈՆԸ ԴՈՒՐՍ Է ԵԿԵԼ ԵԶՐԱՓԱԿԻՉ

Մոսկվայի թատերական-համերգային կենտրոնում նախօրեին Պավել Լիսիցյանի անվան բարիտոնների առաջին միջազգային մրցույթի եզրափակիչ փուլ են դուրս եկել ռուսաստանցիներ Ռոման Բուրդենկոն և Ալեքսեյ Շիշլյաևը, մեր հայրենակից Գևորգ Հակոբյանը և ամերիկացի Լիամ Բոները:

Նշենք, որ մրցույթին մասնակցել են 37 բարիտոն` 13 երկրից. Ռուսաստան, Բելառուս, Վրաստան, Ղազախստան, Ղրղզստան, Հայաստան, Տաջիկստան, Ուկրաինա, Չինաստան, Կորեայի Հանրապետություն, Հունգարիա և ԱՄՆ: Եզրափակիչ դուրս եկած մասնակիցները պայքարելու են 10 հազար դոլար Գրան-պրիի և 2008-09 թթ-ին Մեծ թատրոնի ներկայացմանը մասնակցելու իրավունքի համար:

Հիշեցնենք, որ եզրափակիչ փուլը և մրցանակակիրների Գալա-համերգը տեղի կունենա վաղը` Ռուսաստանի պետական ակադեմիական մեծ թատրոնում: