ՕՊՏԻՄԱԼԱՑՈՒՄԸ ՇԱՐՈՒՆԱԿՎՈՒՄ Է

Երևանի առողջապահական հաստատությունների օպտիմալացման ծրագրի շրջանակում քաղաքապետարանի «Շտապ օգնության մանկական կլինիկական հիվանդանոց», «N6 բուժմիավորում», «Սուրբ Աստվածամայր ծննդատուն», «18 պոլիկլինիկա», «N9 պոլիկլինիկա» առողջապահական պետական փակ բաժնետիրական ընկերությունները միավորվել և ստեղծվել է «Սուրբ Աստվածամայր» բժշկական կենտրոնը: Այս մասին Panorama.am-ի թղթակցի հետ զրույցում հայտնեցին առողջապահության նախարարության հասարակայնության հետ կապերի բաժնից:

Երևանի քաղաքապետարանի առողջապահության և սոցիալական ապահովության վարչության պետ Արմեն Սողոյանի հավաստմամբ, կլինիկաների միավորման արդյունքում ազատվել են միայն «N6 բուժմիավորման» երկու շենքերը: «Կառավարության որոշմամբ, շենքերից մեկը հանձնվել է ֆիզիկական, մյուսը` իրավաբանական անձի: Շենքերից մեկում նախատեսվում է բացել պլաստիկ վիրաբուժության կենտրոն, իսկ մյուս շենքում կգործի բազմապրոֆիլ հիվանդանոց»,-նշեց Ա. Սողոյանը:
«Սուրբ Աստվածամայր» բժշկական կենտրոնը հագեցվել է նոր սարքավորումներով, իրականացվել են վերանորոգման աշխատանքներ` կառավարության կողմից (առողջապահության ԾԻԳ) Համաշխարհային բանկի տրամադրած վարկային միջոցներով, որի ներդրումային ծրագիրը կազմում է 1 մլրդ 55 մլն դրամ գումար:

Նշենք, որ կլինիկաների միավորման արդյունքում բուժաշխատակազմի անդամներից ոչ ոք աշխատանքից չի հեռացվել: Աղբյուրի հաղորդմամբ, 2007թ. ավարտվել են բժշկական կենտրոնի հիմնական մասնաշենքի վնասվածքաբանության, մեծահասակների վիրաբուժական, նյարդաբանական և թերապիայի բաժանմունքների վերանորոգման աշխատանքները: Ներկայումս ավարտվել են 18 մահճակալ հզորությամբ, շուրջ 700 քմ տարածքով վերակենդանացման բաժանմունքի հիմնովին վերանորոգման և ձևավորման աշխատանքները:
Ավելացնենք, որ նախորդ տարվա ընթացքում վերակենդանացման բաժանմունքում բուժվել է 1100 հիվանդ, այդ թվում նորածիններ` գանգուղեղի, կրծքավանդակի և որովայնի օրգանների բնածին արատներով և ձեռքբերովի հիվանդություններով: