ԳԱԱ ՏԱՐԵԿԱՆ ԸՆԴՀԱՆՈՒՐ ԺՈՂՈՎ` ԱՊՐԻԼԻ 25-ԻՆ

Ապրիլի 25-ին Հայաստանի Գիտությունների ազգային ակադեմիայի նախագահության շենքում տեղի կունենա ԳԱԱ տարեկան ընդհանուր ժողովը: ԳԱԱ լրատվական ծառայություն հաղորդմամբ, ժողովին հրավիրված են ՀՀ Նախագահ Սերժ Սարգսյանը, ՀՀ վարչապետ Տիգրան Սարգսյանը, ՀՀ կառավարության և ԱԺ ներկայացուցիչներ, հայտնի գիտնականներ, գիտական հասարակայնություն:

Ժողովի ընթացքում Հայաստանի ԳԱԱ նախագահ Ռադիկ Մարտիրոսյանը զեկուցելու է ՀՀ ԳԱԱ 2007թ. գիտական գործունեության հիմնական արդյունքների մասին: ԳԱԱ 2007թ. գիտակազմակերպական գործունեությունը կներկայացնի ՀՀ ԳԱԱ ակադեմիկոս-քարտուղար Բաբկեն Հարությունյանը, իսկ «հնագիտության և ազգագրության ինստիտուտի 2003-2007թթ. հնագիտական պեղումների հիմնական արդյունքները և դրանց նշանակությունը Հայոց պատմության մի շարք հիմնահարցերի լուծման գործում» գիտական զեկույցով հանդես կգա Պ. Ավետիսյանը: Տեղի կունենա ԳԱԱ գիտական և գիտակազմակերպական գործունեության արդյունքների քննարկում: