«ՕՍԿԱՐ» ՄՐՑԱՆԱԿԻ ԴԱՓՆԵԿԻՐՆԵՐԻ ԱՆՈՒՆՆԵՐԸ ԿՀՐԱՊԱՐԱԿՎԻ ՀՈՒՆՎԱՐԻ 22-ԻՆ

«Օսկար» մրցանակի դափնեկիրների ընտրության առաջին փուլն արդեն մեկնարկել է: Քվեաթերթիկներն ուղարկվել են Ամերիկյան կինոակադեմիայի անդամներին: Այս մասին հաղորդում են արտասահամանյան լրատվամիջոցները:

Ակադեմիայի`ձայնի իրավունք ունեցող 5810 անդամները պետք է որոշեն դերասանների անունները և կինոնկարների անվանումները, որոնք կընդգրկվեն թեկնածուների ցուցակում. նշված ցուցակը կհրապարակվի հունվարի 22-ին: Այնուհետև կմեկնարկի երկրորդ փուլը, որի արդյունքները կամփոփվեն մրցանակաբաշխության պաշտոնական արարողության ընթացքում, որը տեղի կունենա փետրվարի 22-ին:

Այս անգամ հեղինակավոր մրցանակաբաշխության արարողությունը կվարի ավստրալիացի դերասան Հյու Ջեքմանը: «Տարվա լավագույն ֆիլմ» անվանակարգում Օսկարի գլխավոր հավակնորդներն են բրիտանացի ռեժիսոր Դենի Բոյլի «Միլիոնատերը ետնախորշից» և «Բենջամին Բաթնի խորհրդավոր գործը», որտեղ գլխավոր դերում հանդես է եկել Բրեդ Փիթը: