ԱՐՑԱԽԻ ՄԱՍԻՆ ՖԻԼՄԸ ԱՐԺԱՆԱՑԵԼ Է ՀԵՂԻՆԱԿԱՎՈՐ ՄՐՑԱՆԱԿԻ

Հարավային Կալիֆորնիայի ռադիո և հեռուստանորությունների ասոցիացիան (Radio& Television News Association of Southern California, www.rtna.org) «Ոսկե խոսափող» (Golden Mike Awards) մրցանակ է շնորհել «Լեռնային Ղարաբաղ, Արցախ. Պայքար ազատության համար» վավերագրական ֆիլմին: Ինչպես տեղեկացնում են ԼՂՀ ԱԳՆ մամուլի ծառայությունից, մրցանակը հանձնվել է ֆիլմի համահեղինակ և համապրոդյուսեր Փիթեր Մուսուրլյանին «Յունիվերսալ Հիլթոն» հյուրանոցում տեղի ունեցած պաշտոնական արարողության ժամանակ: Ֆիլմի մյուս համահեղինակն ու պրոդյուսերն է ԱՄՆ-ում ԼՂՀ նախկին մշտական ներկայացուցիչ, այժմ ԼՂՀ արտաքին գործերի նախարարի տեղակալ Վարդան Բարսեղյանը: Ֆիլմի հիմնական տեսանյութերը տրամադրել է ղարաբաղցի հեռուստալրագրող, «Ծիր Կաթին» ստուդիայի տնօրեն Նարինե Աղաբալյանը:

2008-ի սեպտեմբերին ֆիլմը ցուցադրվել է ԱՄՆ Կոնգրեսում (Վաշինգտոն), «ԼՂՀ/Արցախ. Ազատության, ժողովրդավարության և առաջընթացի 20 տարիներ» միջոցառման շրջանակներում` ԱՄՆ կոնգրեսականների, դիվանագետների, հայտնի իրավապաշտպանների, փորձագետների և հասարակության ներկայացուցիչների մասնակցությամբ:

«Ոսկե խոսափող»-ը, որը հիմնադրվել է ասոցիացիայի կողմից 59 տարի առաջ, հեռուստա- եւ ռադիոլրագրության բնագավառի ամենահեղինակավոր մրցանակներից է: Այս տարվա մրցանակակիրների թվում է CNN-ի հայտնի լրագրող Լարրի Քինգը: