ԼԱՏՎԻԱՆ ԱՐՁԱՆԱԳՐԵԼ Է Ա ԳՐԻՊԻ ԱՌԱՋԻՆ ԴԵՊՔԸ

Լատվիայի առողջապահության նախարարությունն այսօր առաջին անգամ հաստատել է երկրում Ա գրիպով մարդու վարակվելու փաստի մասին:

Այս մասին տեղեկացնում է «Ռոյթերս» լրատվական գործակալությունը:

Տեղեկատվության համաձայն` հիվանդ կինը վերջերս եղել է ԱՄՆ-ում և Կանադայում: Հունիսի 21-ին Լատվիա է վերադարձել՝ կանգ առնելով Բեռլինում:

Առողջապահության նախարարության փաստաթղթում նշվում է, որ կնոջ մոտ հիվանդության ախտանիշերն ի հայտ են եկել ինքնաթիռում, իսկ վայրէջքից հետո նա փոխադրվել է լատվիական համաճարակաբանական կենտրոն, որտեղ այժմ բուժման կուրս է անցնում:

Նշենք, որ Առողջապահության համաշխարհային կազմակերպությունը նախօրեին հայտարարել է, որ 99 երկրում և տարածքներում Ա գրիպով հիվանդացության 52 հազար 160 դեպք է գրանցվել: Հիվանդներից 231-ը մահացել են: