«ԱՆԿԱԽ ԱՐՑԱԽ». ՆԱԽԱԳԾԻՆ ՄԱՍՆԱԿՑԵԼՈՒ ԵՆ ՆԱԵՎ «ՀԱՅ ՓՈՔՐԻԿ ԵՐԳԻՉՆԵՐ»-Ը

Մշակույթի նախարարության և ԼՂՀ մշակույթի և երիտասարդության հարցերի նախարարության աջակցությամբ` սեպտեմբերին «Հայ փոքրիկ երգիչներ» միջազգային ասոցիացիան «Մշակութային մարզ» ծրագրի շրջանակներում կիրականացնի բարեգործական նախագիծ` նվիրված Արցախի անկախության օրվան:

Մշակույթի նախարարությունից հայտնեցին, որ նախագծի շրջանակներում Ստեփանակերտում, Շուշիում, Մարտակերտում, Հադրութում, Ասքերանում և Վանք գյուղում կանցկացվի երգչախմբային փառատոն` «Անկախ Արցախ» խորագրով, որին կմասնակցի նաև «Հայաստանի փոքրիկ երգիչներ» երգչախումբը:

«Հայաստանի փոքրիկ երգիչներ» երգչախմբի գեղարվեստական ղեկավար և գլխավոր խմբավար` Տիգրան Հեքեքյանը փառատոնի ընթացքում արցախյան խմբավարների և երգչախմբերի համար կանցկացնի վարպետաց դասեր և բաց փորձեր, ինչը խթան կհանդիսանա Արցախում երգչախմբային արվեստի զարգացմանն ու տարածմանը:

Հայաստան-Արցախ մշակութային կապերի ամրապնդման նպատակով «Հայաստանի փոքրիկ երգիչներ» երգչախումբը տեղի երգչախմբերի հետ համատեղ կկատարեն մի քանի ստեղծագործություններ, որոնց թվում կհնչի նաև Էդգար Հովհաննիսյանի «Էրեբունի -Երևան» երգը: