Ս. ԲՅՈՒՐԱՏԻ ԱՆՎԱՆ ԴՊՐՈՑԻ ՍԱՆԵՐԻՆ ՇՆՈՐՀԱՎՈՐԵՑ ՊԱՇՏՊԱՆՈՒԹՅԱՆ ՆԱԽԱՐԱՐԸ

Գիտելիքի օրվա առիթով այսօր պաշտպանության նախարար Սեյրան Օհանյանն այցելեց բանաստեղծ, հրապարակախոս, Հայոց Մեծ եղեռնի նահատակ Սմբատ Բյուրատի անվան Երևանի թիվ 125 միջնակարգ դպրոց:

2009-2010 թթ. ուսումնական տարվա առաջին օրը պաշտկանության նախարարը Բյուրատի անվան դպրոցի սաների համար արիության դաս անցկացրեց: Նախ նախարարը շնորհավորեց աշակերտներին, ուսուցիչներին ու ծնողներին, ապա մաղթեց, որ մատաղ սերունդը լինի ավելի կրթված, դաստիարակված ռազմահայրենասիրությամբ, նվիրված լինի իր երկրին և ժողովրդին:

«Ի ուրախություն մեր ազատատենչ ժողովրդի` մենք կարողացանք նվաճել մեր անկախությունը, ազատագրել Լեռնային Ղարաբաղը` հայ ժողովրդի քաջորդիների շնորհիվ: Դուք ունեք պետականություն և այդ մեծագույն արժեքը պետք է պահպանեք ու հեռու մղեք մեր երկրին սպառնացող բոլոր վտանգները»,-ասաց նախարարը:

Ըստ նրա, 1988-ից հայ ժողովուրդը միասնականություն է դրսևորել և կարողացել է պարտադրված պատերազմում նունիսկ դաժան պայմաններում պատվով դուրս գալ ու հաղթել: Նախարարը կարևորեց, որ հայը կարողանում է միասնական լինել պատերազմի պահին, բաըց և նշեց, որ հարկավոր է կուռ լինել նաև խաղաղության ժամանակ:

Անդրադառնալով հարևան Ադրբեջանի կողմից անընդհատ հնչող հայտարարություններին` Ս. Օհանյանը նշեց, որ «անընդհատ հնչող ռազմական սպառնալիքները և Զինված ուժերի համալրմանը վերաբերող ռազմական հիստերիան» չպետք է մտահոգության առիթ լինեն: Նախարարը նշեց, որ 1992-ին ադրբեջանցիները ռազմական տեխնիկայով և քանակապես գերազանցում էին հայերին, բայց հայ ժողովուրդը ցուցադրելով իր ողջ ռազմարվեստը կարողացավ հասնել պատմական հաղթանակի:

«Դուք պետք է օրինակ վերցնեք մեր հերոսներից և երբեք չերկնչեք դժվարությունների առջև»,-նկատեց Ս. Օհանյանը:

Նշենք, որ պաշտպանության նախարարը աշակերտներին նվիրեց Արցախյան պաշտպանական բանակին նվիրված իր հեղինակած` «21-րդ դարի բանակը» գիրքը: Իսկ դպրոցի դասարաններով, մասնավորապես, ռազմագիտության դասարանով շրջելուց հետո, նախարարը աշակերտներին խոստացավ դպրոցում նոր հրաձգարան ստեղծել: