ԵՐԵՎԱՆ ԿԺԱՄԱՆԵՆ ԱՎԵԼԻ ՔԱՆ 150 ԹԱՏԵՐԱԳԵՏ ԵՎ ՇԵՔՍՊԻՐԱԳԵՏ

Վահրամ Փափազյանի անվան Շեքսպիրյան միջազգային թատերական փառատոնը Երևանում կանցկացվի սեպտեմբերի 7-20-ը: Փառատոնի ընթացքում Երևան կժամանեն ավելի քան 150 թատերագետներ և հյուրեր` աշխարհի տարբեր երկրներից` այդ թվում` թատերական գործիչների միության նախագահ Ալեքսանդր Կալյագինը` Ռուսաստանից, Ֆրանսիայից` թատերագետ Իրինա Բրուկը, Լեհաստանից` Գդանսկի Շեքսպիրյան փառատոնի տնօրեն Անժի Ժիրովսկին:

Երևանի քաղաքապետարանի տեղեկատվության և հասարակայնության հետ կապերի վարչության հաղորդմամբ¸ Երևանի քաղաքապետ, Շեքսպիրյան միջազգային թատերական փառատոնի կազմկոմիտեի նախագահ Գագիկ Բեգլարյանն օրերս ընդունել է փառատոնի կազմկոմիտեի անդամներին: Հանդիպմանը քննարկվել են կազմակերպչական հարցեր: