ՄԻ ՔԱՆԻ ՕՐՈՎ ԿԴԱԴԱՐԵՑՎԻ ՌՈՒՍԱԿԱՆ ԲՆԱԿԱՆ ԳԱԶԻ ՄԱՏԱԿԱՐԱՐՈՒՄԸ ՀԱՅԱՍՏԱՆ

Հոկտեմբերի 1-ից 4-5 օրով կդադարեցվի Ռուսաստանից Վրաստանի տարածքով բնական գազի մատակարարումը Հայաստան: Այդ մասին Panorama.am-ին տեղեկացրեց «Հայռուսգազարդ» ընկերության մամուլի քարտուղար Շուշան Սարդարյանը:

«Վրացական կողմը տեղեկացրել է գազամատակարարման դադարեցման մասին մայրուղային գազատարի վրա ձմռան նախապատրաստման հետ կապված պլանային նորոգման աշխատանքներ տանելու համար», -տեղեկացրեց մամուլի քարտուղարը:

Նրա խոսքերով, ոչ մի մտահոգիչ բան չկա` տրանզիտային գազատարի վրա հաճախ են նման վերանորոգման աշխատանքներ կատարվում:

Սարդարյանը նաև հավելեց, որ Հայաստանի ներսում բնակչության գազամատակարարումը կիրականացվի ինչպես միշտ և հանրապետության պահանջարկը կապահովվի առանց սահմանափակումների: