«ԶԻԳՄՈՒՆԴ ՖՈԼԻ» ՆԵՐԿԱՅԱՑՈՒՄԸ`«ՀԱՅ ՖԵՍՏԻ» ՇՐՋԱՆԱԿՆԵՐՈՒՄ

«ՀԱՅ ՖԵՍՏ» միջազգային թատերական փառատոնի շրջանակներում Հայաստան ժամանած Ֆիլիպ Ժանտիի թատրոնի դերսաններն այսօր լրագրողների հետ հանդիպման ժամանակ կիսեցին իրենց տպավորությունները երեկ կայացած «Զիգմունդ ֆոլի» ներկայացման մասին:

Դերասան Էրիկ դե Սարիան նշեց, որ ինքը շատ զարմացած է, թե ինչպիսի ուշադրությամբ էր հայ հանդիսատեսը հետևում ներկայացմանը: Նա, ներկայացնելով, թե ինչի մասին է ներկայացումը, նշեց, որ «Զիգմունդ Ֆոլին» պատմում է ինչպես է հեղինակը հանկարծակի արթնանում և ահով տեսնում, որ իր ձախ ձեռքը արդեն ինչ-որ ժամանակ քչփորում է իր գրապանները, իր դրամապանակը: Տեղի է ունենում խելահեղ հանդիպում հեղինակի և իր ձախ ձեռքի միջև:

«Այս ներկայացման նպատակն է, մարդկանց ներկայացնել, որ մարդ պետք է միշտ ելքեր փնտրի հաղթահարելու իր մեջ առկա եսերի բախումը»,-ասաց դերասանը:

«Մենք հուսով ենք, որ «Զիգմունդ Ֆոլի» ներկայացումը շատ է դուր եկել հայ հանդիսատեսին»,- կարծիք հայտնեց Էրիկ դե Սարիան:

Դերասանը պատմեց, որ այս ներկայացումը սոտեղծվել է Ֆիլիպ Ժանտիի և իր տիկնոջ Մարի Անդերվուդի կողմից`1983-1984 թվակններին: Այս ներկայացումը ներկայացվել է շուրջ 100 անգամ` հիմնականում Ֆրանսիայում և Եգիպտոսում: Այն ներկայացվել է մինչև 1996 թվականը, որից հետո ներկայացման հեղինակը սկսել է զբաղվել ռեժիսուրայով: Իսկ 2000 թվականին այն որոշ փոփոխություններով կրկին ներկայացվել է հանդիսատեսին:

Նշենք, որ «Զիգմունդ Ֆոլի» ներկայացումը մասնակցել է Էդինբուրգի հեղինակավոր փառատոնին և արժանացել է թատերագետների ամենաբարձր պրոֆեսիոնալ գնահատականին: Աշխարհահռչակ Ֆիլիպ Ժանտիի թատերական ընկերությունը ստեղծվել է 1967 թվականին:

Պար, երաժշտություն, կախարդանք `այս ամենը կարելի է տեսնել ճանաչված ֆրանսիացու իրերի, մատների և տիկնիկների թատրոնում:

«ՀԱՅ ՖԵՍՏ» յոթերորդ միջազգային թատերական փառատոնը Երևանում մեկնարկել է հոկտեմբերի 1-ին, իսկ փակումը տեղի կունենա հոկտեմբերի 8-ին: Այս տարի փառատոնում հանդես կգան 22 երկրներից շուրջ 33 թատերական խմբեր: