Լենոնի անվան աստղը անհետացել է հոլիվուդյան Փառքի արահետից

Աշխրահահռչակ բիթլ Ջոն Լենոնի անվան աստղը Հոլիվուդի Փառքի արահետի վրայից խորհրդավոր կերպով անհետացել է: Այս մասին տեղեկացնում է բրիտանական «Գարդիանը»: Լենոնի անվան աստղի տեղը ծածկված է սև պոլիէթիլենային ծածկոցով:

Երգչի երկրպագուները մտավախություն ունեն, որ աստղը գողացել են: Բայց նաև լրատվամիջոցը չի բացառում, որ այն ուղղակի հանել են, որպեսզի  նորը տեղադրեն հաջորդ տարի փետրվարի 8-ին ընդառաջ, երբ Փառքի արահետի վրա է հայտնվելու նաև The Beatles-ի մյուս անդամ Ռինգո Սթարի անվան աստղը:

Կատարվածի առիթով Հոլիվուդի առևտրային պալատի ներկայացուցիչները դեռևս որևէ պաշտոնական մեկնաբանություն չեն տվել:

Ջոն Լենոնի անվան աստղը հայտնվել է հոլիվուդյան արահետի վրա 1988-ի սեպտեմբերի 30-ին: Նրա հետ միասին Փառքի արահետի վրա է տեղադրված նաև The Beatles-ի մյուս աստղի` Ջորջ Հարիսոնի անվան աստղը, իսկ ահա Պոլ Մաքքարտնին սեփական աստղ չունի: