Ամենից շատ կարդացված նյութեր

10:38 02/04/2010

ԱՊՀ երկրների ֆինանսների նախարարները քննարկում են ազգային արժույթների փոխադարձ արժենշման հնարավորությունը

ԱՊՀ անդամ երկրների ֆինանսների նախարարները քննարկում են ազգային արժույթի փոխադարձ արժենշման հնարավորությունը, որը կնպաստի դրանց փոխարժեքի օբյեկտիվ ձևավորմանը: Այս մասին նախօրեին, ըստ ռուսական լրատվամիջոցների, հայտնել է ՌԴ ֆինանսների նախարար Ալեքսեյ Կուդրինը՝ ամփոփելով Մոսկվայում անցկացված ԱՊՀ անդամ երկրների ֆինանսների նախարարների մշտապես գործող խորհրդակցության չորրորդ նիստը:

«Իրավիճակը զգալիորեն կպարզեցվի, եթե լինի ազգային արժույթների փոխադարձ արժենշում»,-ասաց Կուդրինը:

Հիմա այդ արժենշումներն արվում են երրորդ արժույթի միջոցով, որի փոխարժեքը պայմանական է: Իսկ արժենշման դեպքում փոխարժեքը, ըստ Կուդրինի, կլինի օբյեկտիվ:

Հիշեցնենք, որ Հայաստանի ֆինանսների նախարար Տիգրան Դավթյանը ևս մասնակցում է այդ նիստին:

Նիստում մասնակիցները ներկայացրել են իրենց երկրների մակրոտնտեսական ընթացիկ իրավիճակը, քննարկել ֆինանսատնտեսական ճգնաժամի հետևանքների հաղթահարմանն ուղղված ԱՊՀ երկրների կողմից համատեղ իրականացվող միջոցառումները, ինչպես նաև հարցեր` Միջպետական բանկի խնդիրների հետ կապված:

Տ. Դավթյանը մասնակցել է նաև Եվրասիական տնտեսական համագործակցության 8-րդ նիստին, որի ընթացքում քննարկվել են անդամ-երկրների տնտեսական և ֆինանսական համագործակցությանն առնչվող հարցեր` այդ թվում համատեղ իրականացվող հակաճգնաժամային ծրագրերի ընթացքին և Եվրասիական տնտեսական համագործակցության Հակաճգնաժամային հիմնադրամի գործունեությանը վերաբերող հարցեր:

Placeholder