Ս. Կարապետյան. Սփյուռքում ապրող շուրջ 7 մլն հայ ակամա ավարտել է օտարալեզու դպրոց

«Բնության մեջ մի բան միշտ մեկ այլ բանի հաշվին է լինում»,- այսօրվա ասուլիսում ասաց հուշարձանագետ Սամվել Կարապետյանը` անդրադառնալով օտարալեզու դպրոցների հարցին:

Նա կարծում է, թե օտարալեզու դպրոցներին զարկ տալը կլինի մայրենիի վտանգման հաշվին:

Ս. Կարապետյանն, անդրադառնալով այն կռվանին, թե այսպիսով մենք կունենանք մրցունակ քաղաքացիներ, օրինակ բերեց Սփյուռքում ապրող շուրջ 7 մլն հայերին, ովքեր ակամա ավարտել են օտարալեզու դպրոցներ:

«Մեր ազգի շուրջ 2/3-րդն արդեն մրցունակ է: Սա մեր ազգի գլխին պատուհաս է դարձել, քանի որ ծառացել է ձուլման վտանգը»:

Ս. Կարապետյանը նկատեց, որ այնտեղ գործող հայկական դպրոցները հայերենով միայն հայոց լեզուն և գրականությունն են դասավանդում:

Նրա խոսքով, այսպիսով Հայսատանում էլ կհայտնվեն հայերենով չմտածող հայեր:
Բանախոսը կարծում է, որ մայրենի լեզվով կրթվելը նաև հայրենասեր լինելու գրավականն է: