Արցախի ապահովագրական շուկայի հարցերն են քննարկվել նախագահի մոտ

Արցախի Հանրապետության Նախագահ Բակո Սահակյանը հունիսի 12-ին ընդունել է Ստեփանակերտում անցկացվող Հայաստանի ապահովագրողների արտագնա համաժողովի մասնակիցներին: Այդ մասին տեղեկացնում են Արցախի նախագահի լրատվական ծառայությունից:

Հանդիպման ընթացքում քննարկվել են Արցախի ապահովագրական շուկայի կայացմանն ու զարգացմանը, ինչպես նաեւ Արցախում մատուցվող ապահովագրական ծառայությունների տեսակների ընդլայնմանը վերաբերող հարցեր:

Բակո Սահակյանն ընդգծել է Հայաստանի ապահովագրական ընկերությունների հետ փոխշահավետ գործունեություն հաստատելու շահագրգռվածությունը` այն դիտելով որպես տնտեսության զարգացման կարեւոր գործոններից մեկը:
 
Հանդիպմանը մասնակցել են Արցախի Հանրապետության փոխվարչապետ, ֆինանսների նախարար Սպարտակ Թևոսյանը, պաշտոնատար այլ անձինք: