Հայկական մրցանակակիր ֆիլմերը ցուցադրվելու են Ամերիկյան Հանրային հեռուստատեսությամբ

Առաջին անգամ երկու հայկական մրցանակակիր վավերագրական ֆիլմեր, առաջիկա երկու կիրակի օրերին կցուցադրվեն ԱՄՆ հանրային Փի Բի Էս (PBS) հեռուստատեսությամբ:
Այս մասին հայտնում են Բարս Մեդիա ընկերությունից:

Կիրակի, հոկտեմբերի 17-ին Փի Բի Էս- ի հեռուստակայանները ԱՄՆ ողջ տարածքում կներկայացնեն «Հայաստանի վերջին լարախացը»` ջերմ, խոհական, գեղեցիկ պատմություն լարախաղացների մեռնող արվեստի, երկու հին վարպետների շարունակական մրցակցության իրենց միակ աշակերտի նկատմամբ փայփայած հույսերի մասին: Ֆիլմ այս տարի «Ոսկե Ծիրան» փառատոնում արժանացել է Լավագույն Հայկական ֆիլմ մրցանակին, իսկ «Ռոսիա» վավերագրական ֆիլմերի փառատոնում՝ «Լավագույն լիամետրաժ վավերագրական ֆիլմ» 7 «Սցենարի լավագույն զարգացում» մրցանակներին: Այն արդեն ցուցադրվել է Ճապոնական Էն Էյջ Քեյ (NHK), Շվեդական Էս Վի Թի (SVT) և այլ մի շարք եվրոպական հեռուստաալիքներով:

Հաջորդ կիրակի, հոկտեմբերի 24-ին նույն հեռուստակայանները կցուցադրեն «Պատմություններ պատերազմի 7 խաղաղության օրերից» կինոնկարը, որ ներկայացնում է Արցախյան պատերազմի ընթացքում խրամատների մեջ տարիներ անցկացրած մարտիկների կյանքի մասին: Այս ֆիլմն արդեն ցուցադրվել է Բի-Բի-Սի, ԱՌՏԵ և այլ միջազգային հեռուստաընկերությունների կողմից` արժանանալով ավելի քան 20 մրցանակների` ներառյալ FIPRESCI-ի` Կինոքննադատների միջազգային ֆեդերացիայի մրցանակը, իսկ եւ Նյու-Յորքի Տրիբեկա Ֆիլմերի փառատոնում ֆիլմի ռեժիսոր Վարդան Հովհաննիսյանին շնորհվեց «Վավերագրական Ֆիլմերի Լավագույն Նոր Ռեժիսոր» մրցանակը:

«Հայաստանի վերջին լարախաղացը» երիտասարդ ռեժիսորներ Իննա Սահակյանի և Արման Երիցյանի համատեղ աշխատանքն է: Երկու հեղինակներն էլ մի քանի վավերագրական ֆիլմեր են ստեղծել վերջին տասնամյակում: Ի. Սահակյանը հեղինակել է ավելի քան 10 սոցիալական վավերագրություններ հայկական հեռուստատեսության համար և համագործակցել իբրև ռեժիսորի ասիստենտ «Պատմություններ պատերազմի և խաղաղության օրերից» ֆիլմում: Ա.Երիցյանը ղեկավարել է մի շարք մրցանակակիր վավերագրական ֆիլմեր, ներառյալ «Բաց երկնքի տակ» և «Մնաս բարով Ֆելլինի» կինոֆիլմերը:

Փետրվար ամսից նախատեսվում է նաև ֆիլմերի լայնէկրան ցուցադրումը Հայաստանի կինոթատրոններում:
Երկու ֆիլմերն էլ ստեղծվել են Բարս Մեդիա ընկերությունում, որը հիմնադրվել է 1993 թ. Վարդան Հովհաննիսյանի կողմից: Բարս Մեդիա-ն մասնագիտանում է մարդկային պատմությունների, մշակույթի և պատմության, ինչպես նաև այլ սոցիալական խնդիրների վերաբերյալ վավերագրությունների ստեղծման մեջ: Ներկայումս ընկերությունը պատրաստում է վավերագրական ֆիլմեր Աֆրիկայում, Ռուսաստանում և Աֆղանստանում: