Միշել Ցեն-Ռուֆինեն. «Ոմանք կարող են կաշառվել, ոմանք էլ թուլություն ունեն կանանց նկատմամբ»

ՖԻՖԱ-ի նախկին գլխավոր քարտուղար և փոխնախագահ Միշել Ցեն-Ռուֆինենը դարձել է անգլիացի լրագրողների հերթական «զոհը»: Չիմանալով, որ զրույցը ձայնագրվում է, շվեյցարացի 51-ամյա իրավաբանը խոսել է այն մասին, թե ինչ է կատարվում միջազգային ֆուտբոլային գերատեսչությունում: Ի դեպ, ժամանակին նա հեռացել է կազմակերպությունից` ՖԻՖԱ-ի նախագահ Բլատտերին մեղադրելով ֆինանսական մեքենայությունների և կոռուպցիայի մեջ:

«Ես երբեք չէի վաճառի իմ ձայնը, բայց ՖԻՖԱ-ում կան մարդիկ, ովքեր նման բան կանեն»,- Ցեն-Ռուֆինենի խոսքերը մեջբերել է «The Times»-ը:

Գործկոմի որոշ անդամներ, նախկին գլխավոր քարտուղարի խոսքերով, պատրաստ են կաշառք վերցնել, մյուսներին գումար պետք չէ, բայց թուլություն ունեն կանանց նկատմամբ: Գործկոմի մեկ այլ անդամի Ցեն-Ռուֆինենն անվանել է որպես «ամենագլխավոր գանգստեր, որին երբևէ կարելի է գտնել երկրի վրա»:

Ավելացնենք, որ ֆուտբոլային պաշտոնյաների անունները լրագրողների կողմից միտումնավոր փոխվել են: