Արցախի նախագահականում ընդունել են հյուրեր Հունաստանից

Արցախի Հանրապետության նախագահ Բակո Սահակյանը նոյեմբերի 1-ին ընդունել է Հունաստանի Հայ դատի հանձնախմբի անդամ Խաչիկ Խաչատուրյանին և Աթենքի Խաձիկիրիակիո գիշերօթիկ հաստատության տնօրեն Էվի Կալիմնյուին: Այս մասին տեղեկացնում են Արցախի նախագահի լրատվական ծառայությունից:

Բակո Սահակյանը բարձր է գնահատել հյուրերի ջանքերը՝ ուղղված Հունաստանում Արցախի զոհված ազատամարտիկների երեխաների հանգիստը կազմակերպելու գործին` հույս հայտնելով, որ այս բարեգործական կարևոր նախաձեռնությունը հետագայում ևս կունենա իր շարունակությունը:

Հանդիպմանը մասնակցում էին Արցախի Հանրապետության մշակույթի նախարար Նարինե Աղաբալյանը ու կրթության եւ գիտության նախարար Վլադիկ Խաչատրյանը: