Դյութուա. Հայաստանում ես հանդիպել եմ տաղանդավոր երիտասարդների, որոնք կարող են փայլուն նախագծերի հեղինակ դառնալ

Այսօր Orange­ի գլխավոր տնօրեն Բրունո Դյութուան ԵՊՀ ՏՏ կենտրոնում հանդիպել էուսանողների հետ` լավագույն ուսանողների հետ ծանոթանալու և Orange Նորարարության մրցանակի վերաբերյալ վերջիններիս հետաքրքրող հարցերին պատասխանելու նպատակով:

Նորարարության մրցույթը մեկնարկել է մեկ ամիս առաջ Երևանի Պետական Համալսարանի և Հայաստանի Պետական Ճարտարագիտական Համալսարանի (Պոլիտեխնիկ) երևանյան և վերջիններիս մարզային մասնաճյուղերի ուսանողների համար: Մրցույթի արդյունքում լավագույն նորարարական գաղափարի հեղինակը ճանաչված ուսանողը կմեկնի Ֆրանսիա` 6-ամսյա վճարվող պրակտիկայի Orange-ի գիտահետազոտական լաբորատորիաներոից մեկում և կաշխատի նորարարական նախագծերի վրա:

«Հայաստանում ես հանդիպել եմ բազմաթիվ տաղանդավոր երիտասարդների, որոնք, եթե խրախուսում ու աջակցում ստանան, կարող են փայլուն նախագծերի հեղինակը դառնալ: Orange Արմենիան մեծ միջազգային Խմբի մասն է կազմում և մենք ուզում ենք տալ այդ երիտասարդներին հնարավորություն` փորձել իրենց և կատարելագործվել մեր Խմբի բազմաթիվ գիտահետազոտական լաբորատորիաներից մեկում: Վստահ եմ, որ հաղթողը կվերադառնա Հայաստան որպես պատրաստի մասնագետ և օգտակար կլինի ինչպես իր համալսարանին, այնպես էլ երկրին»,- ասել է Orange-ի գլխավոր տնօրեն Բրունո Դյութուան ուսանողների հետ հանդիպման ժամանակ:

Երկու համալսարանների ռեկտորները ողջունել են Orange-ի այս նախաձեռնությունը և ամեն կերպ աջակցել մրցույթի անցկացմանը` հատկապես կարևորելով հայ ուսանողների համար այսօրինակ աշխատանքային պրակտիկայի ընձեռած ապագա հնարավորությունները, ինչպես նաև հետագայում գիտական աշխատանքի պատրաստվող մասնագետների համար նորանոր հմտությունների ձեռքբերումը:

Մրցույթի կարելի է մասնակցել` մինչև ապրիլի 20-ը գրանցվելով Orange-ի պաշտոնական վեբկայքում հատուկ ստեղծված կայքէջում և էլեկտրոնային ձևաչափով ուղարկելով նախագիծը և կենսագրությունը:

11 հոգուց կազմված Ժյուրին, որի կազմում են Orange Արմենիայի հայ և արտասահմանցի 7 մասնագետներ, Orange Lab-երի 2 ներկայացուցիչ, ինչպես նաև` մեկական ներկայացուցիչ ԵՊՀ-ից և ՀՊՃՀ-ից, կգնահատի ներկայացված գաղափարներն ըստ հետևյալ չափանիշների. նորարարական, հետաքրքիր, օգտակար և հեշտ կիրառելի: Գաղափարը պետք է վերաբերի հեռահաղորդակցության ոլորտին (ցանց և ինժեներիա, ծրագրային ապահովում և հավելվածներ, շարժական կապի նորարարական եղանակներ, սարքավորումներև այլն) և ներկայացված լինի անգլերեն կամ ֆրանսերեն լեզուներով: Այս լեզուներից մեկի բավարար տիրապետումը անհրաժեշտ է հետագայում Ֆրանսիայում պրակտիկան անցնելու համար: Մրցույթի հաղթողի անունը կհրապարակվի Orange-ի կայքում մայիսի 20-ին: