«Չկա լիակատար պատկերացում «տեղեկատվական պատերազմի բոլոր օրենքների» մասին»

Այսօր «Նորավանք» գիտակրթական հիմնադրամում կայացավ «Հայկական տեղեկատվական ռեսուրսների համագործակցության խնդիրները տեղեկատվական անվտանգության համատեքստում» թեմայով կլոր սեղան:

«Նորավանք» հիմնադրամի գործադիր տնօրեն Գագիկ Հարությունյանը, բացելով քննարկումը, նշեց, որ հանդիպման գլխավոր նպատակն է տեղեկատվական անվտանգության ոլորտում առկա գիտական և հասարակական ներուժի ավելի արդյունավետ օգտագործումը:

Վերջինիս խոսքերով, չնայած մեզ մոտ այս ոլորտում վերջին շրջանում որոշակի հաջողություններ են արձանագրվում, այնուամենայնիվ անելիքները դեռևս շատ են:

Ըստ Գագիկ Հարությունյանի, թեև տեղակատվական ռեսուրսների, ԶԼՄ-ների գործունեությունը վերջին շրջանում որակական տեսակետից զարգացում է ապրել, այնուամենայինիվ,սակայն դեռևս չկա լիակատար պատկերացում «տեղեկատվական պատերազմի բոլոր օրենքների» մասին:

«Տեղեկատվական պատրազմում հաղթելու համար անհրաժեշտ է սեփական ռեսուրսների գերկայության միջոցով հակառակորդի ռեսուրսների ճնշում»,- նշեց Գագիկ Հարությունյանը:

Վերջինիս կարծիքով, ներկայումս ոլորտում ստեղծվել է մի վիճակ, երբ գիտական, վերլուծական միտքը, այսինքն՝ դաշտում գործող փորձագետները մի կողմից, և ԶԼՄ-ները՝ մյուս կողմից, գործում են ոչ համակցված:

Եվ հենց այս բացը լրացնելու նպատակով Գագիկ Հարությունյանը առաջարկեց ստեղծել համագործակցության մի յուրահատուկ ձևաչափ, որը հնարավորություն կտա օկումուլացնել և ավելի արդյունավետ օգտագործել ներկայումս դաշտում առկա թե փորձագիտական, և թե լրագրողական ամբողջ ներուժը:

Քննարկմանը ներկա փորձագետ Տիգրան Քոչարյանը իր հերթին կարևորեց սփյուռքի ներուժի օգտագործումը:

ՀՀ ՊՆ ներկայացուցիչ Հասմիկ Ամիրխանյանը խիստ կարևորեց ՀՀ զինված ուժերի վերաբերյալ ճշգրիտ տեղեկատվության մատուցումը: