Ստիվ Վոզնյակին կշնորհվի ՀՊՃՀ պատվավոր դոկտորի կոչում

Վաղը Հայաստանի պետական ճարտարագիտական համալսարանը (Պոլիտեխնիկ) կհյուրընկալի ՏՏ ոլորտում համաշխարհային ներդրման համար Հայաստանի Հանրապետության Նախագահի 2011թ. Մրցանակի դափնեկիր, «APPLE COMPUTER» կորպորացիայի համահիմնադիր Ստիվ Վոզնյակին և նրա տիկնոջը` Ջանեթ Վոզնյակին:

Հայաստանի պետական ճարտարագիտական համալսարանի մամուլի ծառայությունից հայտնում են, որ ի արժևորումն տեղեկատվական և հաղորդակցման տեխնոլոգիաների ոլորտում Apple Computer կորպորացիայի համահիմնադիր Ստիվ Վոզնյակի համաշխարհային ակնառու ներդրման և ի նշանավորումն Հայաստանի պետական ճարտարագիտական համալսարան (Պոլիտեխնիկ) կատարած նրա այցելության` ՀՊՃՀ Գիտական խորհրդի որոշմամբ Ստիվ Վոզնյակին կշնորհվի ՀՊՃՀ պատվավոր դոկտորի կոչում:

Համալսարանում նախատեսվում են հանդիպումներ ՀՊՃՀ ռեկտոր Արա Ավետիսյանի, բուհի ղեկավար անձնակազմի և ուսանողության ու պրոֆեսորադասախոսական կազմի ներկայացուցիչների հետ:

Մինչ այժմ ՀՊՃՀ պատվավոր դոկտորի կոչում է շնորհվել «INTEL» կորպորացիայի տնօրենների խորհրդի նախկին նախագահ, ՏՏ ոլորտում համաշխարհային ներդրման համար ՀՀ նախագահի 2-րդ մրցանակակիր Քրեյգ Բարրեթին, Զանգեզուրի պղնձամոլիբդենային կոմբինատի տնօրեն Մաքսիմ Հակոբյանին, «Սինոփսիս Արմենիա» ՓԲԸ-ի գլխավոր գործադիր տնօրեն և «Սինոփսիս» ընկերության մարքեթինգի գծով փոխնախագահ Ռիչ Գոլդմանին, ՀՊՃՀ Խորհրդի նախկին նախագահ, պետական և հասարակական ականավոր գործիչ Ֆադեյ Սարգսյանին, ՀՀ ԳԱԱ ակադեմիկոս Սերգեյ Համբարձումյանին, ՀՀ վաստակաշատ ճարտարապետ, ԳԱԱ ակադեմիկոս Վարազդատ Հարությունյանին, Հայաստանի ամերիկյան համալսարանի հիմնադիր-նախագահ Միհրան Աղբաբյանին և Հայ Առաքելական Եկեղեցու ԱՄՆ Արևելյան թեմի առաջնորդ Խաժակ արքեպիսկոպոս Պարսամյանին: