Ամենից շատ կարդացված նյութեր

17:23 12/12/2011

Շուշիում միջազգային չափանիշներին համապատասխան բժշկական համալիր կկառուցվի

Արցախի Հանրապետության Նախագահ Բակո Սահակյանն այցելել է Շուշի շրջկենտրոն, որտեղ աշխատանքային քննարկումներ է անցկացրել քաղաքում նոր բժշկական համալիրի կառուցմանը վերաբերող հարցերի շուրջ: Երկրի ղեկավարը կարևորել է Շուշիում միջազգային չափանիշներին համապատասխան համալիրի կառուցումը՝ այն համարելով քաղաքի զարգացման անհրաժեշտ խթաններից մեկը:

Արցախի Հանրապետության նախագահի աշխատակազմի տեղեկատվության գլխավոր վարչության հաղորդմամբ, նույն օրը` դեկտեմբերի 10-ին Բակո Սահակյանն այցելել է նաև Շուշիում տեղակայված գյուղի և գյուղատնտեսության աջակցության հիմնադրամի պահեստներ և ծանոթացել տեղի պայմաններին: Նախագահը նշել է, որ այս պահեստը համարվում է հանրապետության պետական պահուստի կարևոր բաղադրամասը և գտնվում է իշխանությունների մշտական ուշադրության կենտրոնում:

Այնուհետև Նախագահ Սահակյանն այցելել է Շուշի-Կարմիր Շուկա խաչմերուկում գտնվող կարծր վառելիքով կաթսաների պատրաստման արտադրամաս և ծանոթացել նրա աշխատանքներին, որից հետո ուղևորվել է Հադրութի շրջան:

Ազոխ գյուղում երկրի ղեկավարը այցելել է նոր կառուցվող դպրոցի շինհարթակ, որից հետո հանդիպում է ունեցել համայնքի ներկայացուցիչների հետ և քննարկել այնտեղ առկա հիմնախնդիրներն ու իրականացվելիք ծրագրերը:

Նույն օրը երկրի ղեկավարը Հադրութ քաղաքում մասնակցել է պաշտպանության բանակի սպաներին և ենթասպաներին նոր բնակարանների բանալիների հանձնման հանդիսավոր արարողությանը: Նախագահը արժեքավոր նվերներ է հանձնել բնակարանամուտ տոնողներին և ընդգծել, որ զինծառայողների սոցիալ-կենցաղային պայմանների բարելավումը մշտապես գտնվում է իշխանությունների ուշադրության կենտրոնում:

Placeholder