Հռոմ-Երևան. հավերժական կապեր

Տեղի ունեցավ ՀՀ նախագահ Սերժ Սարգսյանի հանդիպումը Հռոմի քաղաքապետ Ջանի Ալեմանոյի հետ: Հանդիպմանը ներկա էին ՀՀ ԱԳ նախարար Էդվարդ Նալբանդյանը, Երևանի քաղաքապետ Տարոն Մարգարյանը, ՀՀ մակույթի նախարար Հասմիկ Պողոսյանը և հայկական պատվիրակության անդամները: Հռոմի քաղաքապետը ՀՀ նախագահին դիմավորեց քաղաքապետարանում: Նշենք, որ Հռոմի քաղաքապետարանի շենքը թե դիրքով, թե տեսքով պատշաճորեն հարիր է Հռոմի պես հնագույն քաղաքին: Նախագահը քաղաքապետարանի Պատվո հյուրերի գրքում թողեց գրություն.  «Հավերժ քաղաքին հավերժություն»:

Այնուհետև ՀՀ նախագահ Սերժ Սարգսյանը մասնակցեց Բրասկի թանգարանին կից Նավոնա հրապարակում հայկական խաչքարի ցուցադրության բացման արարողությունը: Ողջույնի խոսքով ելույթ ունեցան Հռոմի մշակութային ժառանգության հսկողության պետ Ումբերտո Բրոկոլին, ՀՀ մշակույթի նախարար Հասմիկ Պողոսյանն ու Հռոմի քաղաքապետ Ջանի Ալեմանոն:

Խաչքարի տեղադրումը Հռոմի կենտրոնական հրապարակներից մեկում խորհրդանշական էր. այն փաստեց Հռոմեական հնագույն մշակույթի կողմից հայկականի ընդունումը:

Արարողության վերջում UNISEF-ի իտալական դպրոցի երեխաները կատարեցին Հայաստանի ու Իտալիայի հիմները, որն ընդունվեց ժպիտներով ու ծափողջյուններով: ՀՀ նախագահ Սերժ Սարգսյանը նրանց նվիրեց Նոր Նորքի մանկատան երեխաների ձեռքի աշխատանքները:
Նշենք, որ   իտալական այս դպրոցը և մանկատունը համարվում են «քույր»:

Հերթական հանդիսավոր արարողությունը «Դվին. Հայաստանի մայրաքաղաքը Եվրոպայի և Ասիայի միջև» ցուցահանդեսի բացումն էր:

Տեսնել նմուշներ հնագույն Դվին մայրաքաղաքից Հռոմի թանգարանում` պատիվ էր, հպարտություն ու սեփական մշակույթների արժևորում` երկու կողմերից էլ:

Հիշեցնենք, որ Նախագահ Սերժ Սարգսյանը դեկտեմբերի 12-15-ը աշխատանքային այցով մեկնել է  Իտալիայի Հանրապետություն և Վատիկան: Այցի շրջանակներում Հանրապետության ղեկավարը արդեն հանդիպումներ է ունեցել  Հռոմի պապ Բենեդիկտոս XVI-ի, Իտալիայի նախագահ Ջորջիո Նապոլիտանոյի, Վատիկանի պետքարտուղար Կարդինալ Տարչիցիո Բերտոնեի հետ: Ավելի ուշ նախատեսվում է Նախագահ Սերժ Սարգսյանի հանդիպումները Իտալիայի խորհրդարանի պատգամավորների պալատի նախագահ Ջիանֆրանկո Ֆինիի և ԵԱՀԿ խորհրդարանական վեհաժողովի փոխնախագահ, ԵԱՀԿ ԽՎ-ում իտալական պատվիրակության ղեկավար Ռիկարդո Միլիորիի հետ: Նախագահը օրվա ավարտին հանդիպում կունենա նաև Իտալիայի գործարար համայնքի ներկայացուցիչների հետ:
 
Թեմայի մասին` ՀՀ նախագահը հանդիպում կունենա Իտալիայի գործարարների հետ

Սերժ Սարգսյանը Վատիկանում է. առաջին հանդիպումը Հռոմի պապի հետ էր

Իտալիայի նախագահ. Երկու ժողովուրդների մերձեցման համար խոչընդոտներ գոյություն չունեն

Հռոմը դիմավորեց, ինչպես այն… տեսանք