Արթուր Աբրահամ. «Սա պրոֆեսիոնալ բռնցքամարտիկի կարգավիճակում իմ վերջին պայմանագիրն է»

Պրոֆեսիոնալ բռնցքամարտի միջինքաշային կարգում IBF-ի վարկածով աշխարհի նախկին չեմպիոն Արթուր Աբրահամը, ով վերջերս երկարաձգել է պայմանագիրը «Sauerland Event» պրոմոուտերական ընկերության հետ, հայտարարել է, որ այդ համաձայնագրի ժամկետի ավարտից հետո հրաժեշտ կտա ռինգին: Հիշեցնենք, որ նոր պայմանագրով հայ մարզիկն այդ ընկերությունը կներկայացնի մինչև 2014 թ.:

«Բեռլինում ինձ շատ հարմարավետ եմ զգում: Լավ հարաբերություններ ունեմ մենեջեր Վիլֆրիդ Զաուերլանդի հետ: Շատ բանով եմ նրան պարտական: Մինչև 2012 թ. վերջը ուզում եմ դառնալ աշխարհի չեմպիոն և մենամարտ անցկացնել բեռլինյան «O2» մարզահամալիրում: Առաջիկա տարվա իմ պլանները դրանք են: Կարծում եմ` պրոֆեսիոնալ բռնցքամարտիկի կարգավիճակում դա իմ վերջին պայմանագիրը կլինի: Այնուհետև կմնամ սպորտում, բայց արդեն` որպես մենեջեր»,- Աբրահամի խոսքերը մեջբերել է «BoxingScene»-ն: