Աշխարհահռչակ ջութակահար Նիկոլայ Մադոյանը` «Արամ Խաչատրյան» համերգասրահի բեմում

«Արամ Խաչատրյան» համերգասրահում փետրվարի 11-ին Հայաստանի պետական ֆիլհարմոնիկ նվագախումբը ելույթ է ունենալու աշխարհահռչակ ջութակահար Նիկոլայ Մադոյանի հետ: Համերգը ղեկավարելու է դիրիժոր Վալտե Ջոնը (Հարավային Կորեա):

Համերգին հնչելու են Շուբերտ (Իտալական ոճով նախերգանք D. 590), Պագանինի (Ջութակի կոնցերտ թիվ 3), Դվորժակ (Սիմֆոնիա թիվ 9):

Հայաստանի պետական ֆիլհարմոնիկ նվագախմբի գեղարվեստական ղեկավար և գլխավոր դիրիժոր Էդուարդ Թոփչյանը ավելի վաղ նշել էր, որ Պագանինիի ջութակի 3-րդ կոնցերտը Հայաստանում հնչելու է առաջին անգամ:

Նիկոլայ Մադոյանը ծնվել է 1973 թ. Երևանում: 1988թ. դարձել է Չայկովսկու անվան, այն ժամանակ դեռ համախորհրդային մրցույթի հաղթող: Միջազգային բեմում առաջին անգամ հանդես է եկել 1989թ. Մարինյան թատրոնի հետ Շլեզվիգ-Գոլշտեյնի փառատոնում: Մադոյանը ձայնագրել է 7 ալբոմ: Ջութակահարը ապրում է Գերմանիայում: