Լիբանանում կանցկացվեն հայկական մշակույթի օրեր

2012թ. աշնանը Հայաստանը Լիբանանում մտադիր է անցկացնել մշակութային օրեր: Այս մասին հայտնել է Լիբանանում ՀՀ դեսպան Աշոտ Քոչարյանը Լիբանանի մշակույթի նախարար Գաբի Լեյունի և Բեյրութի քաղաքապետ Բիլալ Համադի հետ հանդիպման ժամանակ: Զրուցակիցների համոզմամբ, դա կնպաստի երկկողմ մշակութային կապերի ամրապնդմանն ու խորացմանը:

ԱԳՆ մամուլի և տեղեկատվության վարչության հաղորդմամբ, մշակույթի նախարարի հետ քննարկվել է նաև Լիբանանում հայկական երաժշտական տարեկան փառատոն կազմակերպելու հնարավորության հարցը:

Դեսպան Քոչարյանը նախարար Լեյունին և Բեյրութի քաղաքապետին փոխանցել է հայկական կողմի պաշտոնական հրավերները մասնակցելու ապրիլին Երևանում կայանալիք միջոցառումներին` նվիրված հայ գրատպության 500- ամյակին և 2012թ.Երևանը՝ գրքի համաշխարհային մայրաքաղաք հռչակմանն առնչվող տոնակատարություններին: